मुंबईचा दिल्लीवर 80 धावांनी दणदणीत विजय

मुंबई इंडियन्सनं चमकदार कामगिरीच्या जोरावर दिल्ली डेअरडेव्हिल्सवर 80 धावांनी शानदार विजय मिळवला

 ऑनलाइन लोकमत

विशाखापट्टणम, दि. 15 - मुंबई इंडियन्सनं चमकदार कामगिरीच्या जोरावर दिल्ली डेअरडेव्हिल्सवर 80 धावांनी शानदार विजय मिळवला आहे. मुंबई इंडियन्सनं दिलेलं 207 धावांच्या लक्ष्याचा पाठलाग करताना दिल्ली डेअरडेव्हिल्सची पुरती तारांबळ उडाली. त्यामुळे दिल्ली डेअरडेव्हिल्सला सर्व गडी गमावून मानहानीकारक पराभवाला सामोरं जावं लागलं. दिल्ली डेअरडेव्हिल्सकडून डी कॉकनं शानदार खेळी करत 4 चौकारांसह 2 षटकार ओढत 40 धावा केल्या. तर पंतनेही डी कॉकच्या मागोमाग 23 धावांची खेळी केलीय. मुंबई इंडियन्सकडून बुमराहनं भेदक गोलंदाजीच्या जोरावर ड्युमिनी, पंत आणि मिश्राला माघारी पाठवले. तर पंड्या, हरभजन सिंग, विनयकुमारनं प्रत्येकी एक बळी मिळवून दिल्ली डेअरडेव्हिल्सच्या धावसंख्येला लगाम घातला. मुंबईने निर्धारित 20 षटकात 4 गड्यांच्या मोबदल्यात 206 धावांचा उभा केलेला डोंगर पाडण्यात दिल्ली डेअरडेव्हिल्सला अपयश आलं आहे. 

तत्पूर्वी कृणाल पांड्याच्या 86 धावांच्या झंझावती खेळीच्या जोरावर मुंबईने दिल्लीसमोर 207 धावांचे आव्हान ठेवले होते. कृणाल पांड्याने 37 चेंडूत 6 षटकार आणि 7 चौकार लगावत केलेल्या शानदार 86 धावा मुंबईच्या इनिंगचं आकर्षण ठरलं. रोहित - गुप्टिलने 46 धावांची सलामी दिली. रोहितने 21 चेंडूत 3 षटकार आणि 1 चौकारांच्या मदतीने 31 धावा केल्या. गुप्टिलने संयमी फलंदाजी करताना 42 चेंडूत 48 धावांची खेळी केली. गुप्टिल आणि कृणाल यांनी दुसऱ्या विकेटसाठी 98 धावांची भागीदारी केली. गुप्टिल, कृणाल बाद झाल्यानंतर धावगती वाढवण्याच्या प्रयत्नात पोलार्डही लगेच तंबूत परतला. शेवटच्या षटकात रायडूने 5 चेंडूत 13 तर बटलरने 9 चेंडूत 18 धावांचे योगदान देत संघाची धावसंख्या 200 पार केली.