वेंगसरकर यांना ‘जीवनगौरव’

जम्मू-काश्मीर संघाचा कर्णधार परवेज रसूल याला २०१३-१४च्या रणजी हंगामात सर्वोत्तम अष्टपैलू खेळाडू म्हणून निवडण्यात आले

मुंबई : भारताचा माजी कर्णधार दिलीप वेंगसरकर यांना भारतीय क्रिकेट नियामक मंडळाचा (बीसीसीआय) यंदाचा कर्नल सी. के. नायडू जीवनगौरव पुरस्कार जाहीर झाला असून, भुवनेश्वर कुमारला सर्वोत्तम आंतरराष्ट्रीय पुरस्काराने गौरविण्यात येणार आहे. २१ नोव्हेंबरला या पुरस्कारांचे वितरण करण्यात येणार आहे. भारताच्या सर्वोत्तम फलंदाजांपैकी एक वेंगसरकर यांनी १९७६ ते १९९१ या कालावधीत भारताचे प्रतिनिधित्व केले. बीसीसीआयचे हंगामी अध्यक्ष शिवलाल यादव आणि सदस्य संजय पटेल यांच्या समितीने वेंगसरकर यांची जीवनगौरव पुरस्कारासाठी निवड केली. त्यांना या पुरस्कारांतर्गत एक सन्मानचिन्ह, चषक आणि २५ लाखांचा धनादेश प्रदान करण्यात येणार आहे. वेंगसरकर यांनी १९७५-७६ या हंगामात इराणी चषक स्पर्धेत मुंबईकडून खेळताना शेष भारताविरुद्ध खणखणीत शतक ठोकले होते. तसेच, १९८३चा विश्वचषक आणि १९८५च्या विश्व अजिंक्यपद स्पर्धेतील विजेत्या भारतीय संघात त्यांचा समावेश होता. १९८७ ते ८९ या कालावधीत भारताच्या कसोटी संघाचे नेतृत्व वेंगसरकर यांच्याकडे होते. याव्यतिरिक्त वेंगसरकर २००६ ते ०८ या कालावधीत वरिष्ठ राष्ट्रीय निवड समितीचे अध्यक्षही होते. लॉर्ड्सवर तीन कसोटी शतक करणारे वेंगसरकर हे एकमेव खेळाडू आहेत. त्यांच्या १२६ धावांच्या फटकेबाजीमुळेच भारताने १९८६ मध्ये लॉडर््सवर कसोटी विजय साजरा केला होता. याआधी सचिन तेंडुलकरला (२००६-०७ व २००९-१९) व वीरेंद्र सेहवाग (२००७-०८), गौतम गंभीर (२००८-०९), राहुल द्रविड (२०१०-११), विराट कोहली (२०११-१२) आणि रविचंद्रन अश्विन (२०१२-१३) यांना पॉली उम्रीगर चषकाने सन्मानित करण्यात आले होते. जम्मू-काश्मीर संघाचा कर्णधार परवेज रसूल याला २०१३-१४च्या रणजी हंगामात सर्वोत्तम अष्टपैलू खेळाडू म्हणून निवडण्यात आले असून, त्याला लाला अमरनाथ चषकाने सन्मानित करण्यात येणार आहे. त्याने ९ सामन्यांत ६६३ धावा आणि २७ विकेट घेतल्या. या पुरस्कारासह त्याला अडीच लाख रुपयांचा धनादेश प्रदान करण्यात येणार आहे. याव्यतिरिक्त कर्नाटक संघाचा कर्णधार विनय कुमार यालाही सर्वोत्तम अष्टपैलू पुरस्काराने सन्मानित करण्यात येणार आहे. विनयने १२ सामन्यांत ११३ धावा व ४० विकेट घेतल्या आहेत. महाराष्ट्राचा मधल्या फळीचा फलंदाज केदार जाधव याने २०१३-१४ च्या रणजी सत्रात सर्वाधिक धावा केल्या आहेत. त्याला माधव राव सिंधिया पुरस्काराने सन्मानित करण्यात येणार आहे. हिमाचल प्रदेशचा गोलंदाज ऋषी धवन यालाही सर्वोत्तम गोलंदाज म्हणून माधव राव सिंधिया चषकाने सन्मानित करण्यात येणार आहे. (वृत्तसंस्था)