सनरायझर्स हैदराबादचा मुंबई इंडियन्सवर सात गडी राखून विजय
By Admin | Updated: April 18, 2016 23:37 IST2016-04-18T23:17:53+5:302016-04-18T23:37:27+5:30
डेव्हिड वॉर्नरच्या शानदार अर्धशतकाच्या जोरावर सनरायझर्स हैदराबादने मुंबई इंडियन्सवर सात गडी राखून विजय मिऴविला. मुंबई इंडियन्सने दिलेल्या १४३ धावांचा पाठलाग
सनरायझर्स हैदराबादचा मुंबई इंडियन्सवर सात गडी राखून विजय
हैदराबाद, दि. १८ - डेव्हिड वॉर्नरच्या शानदार अर्धशतकाच्या जोरावर सनरायझर्स हैदराबादने मुंबई इंडियन्सवर सात गडी राखून दणदणीत विजय मिऴविला. मुंबई इंडियन्सने दिलेल्या १४३ धावांचा पाठलाग करताना सनरायझर्स हैदराबादने १७.३ षटकात ३ गड्यांच्या मोबदल्यात १४५ धावांचा पल्ला गाठला. डेव्हिड वॉर्नरने शानदार फटकेबाजी करताना चार षटकार आणि सात चौकार लगावत ५९ चेंडूत नाबाद ९० धावा केल्या. तर शिखर धवन अवघ्या दोन धावा काढून तंबूत परतला. मोझेस हेन्रिक्स (२०) आणि इऑन मार्गन ११ धावांवर बाद झाले.
याआधी प्रथम फलंदाजीला उतरलेल्या मुंबई इंडियन्सची सुरुवात खराब झाली. मुंबई इंडियन्सने २० षटकात सहा बाद १४२ धावा केल्या. सामन्याच्या पहिल्याच षटकात मुंबई इंडियन्सला पहिला धक्का बसला. सलामीवीर मार्टिन गुप्टिल अवघ्या दोन धावांवर बाद झाला. त्याला गोलंदाज भुवनेश्वर कुमारने झेलबाद केले. फलंदाज अंबाती रायडूने सर्वाधिक जास्त धावा केल्या. त्याने ४९ चेंडूत दोन षटकार आणि तीन चौकार लगावत ५४ धावा केल्या. त्याला बरिंदर सरनने झेलबाद केले. कृणाल पंड्यानेही चांगली खेळी करत नाबाद ४९ धावा केल्या.
पार्थिव पटेल १० धावावंर बाद झाला. तर रोहित शर्मा (५) आणि हार्दिक पंड्या दोन धावा काढून तंबूत परतला. हैदराबाद सनरायझर्सकडून गोलंदाज बरिंदर सरनने तीन बळी घेतले, तर भुवनेश्वर कुमारने आणि मुस्तफिझूर रहमानने प्रत्येकी एक बळी घेतला. मुंबई इंडियन्सकडून गोलंदाज टीम साउदीनेत तीन बळी घेतले.
