ऑनलाइन लोकमत
भुवनेश्वर, दि.8- आशियाई अॅथलेटिक्स चॅम्पियनशिपमचा दुसरा दिवस भारतासाठी अत्यंत चांगला गेला आहे. 3000 मी. स्टीपलचेस या प्रकारात भारताच्या सुधा सिंगने सुवर्णपदक मिळाले आहे. शुक्रवारी भारताने चार सुवर्ण पदके जिंकली होती. 400 मीटरमध्ये भारतीय अॅथलिट्सनी महिला आणि पुरुष दोन्ही गटांमध्ये सुवर्णपदक पटकावले आहे. निर्मला शेरॉन आणि मोहम्मद अनस यांनी ही पदके पटकावली आहेत. 1500 मी धावण्याच्या स्पर्धेमध्ये पीयू चित्रा हिने प्रथम येत सुवर्णपदक पटकावले, तर पुरुष गटात अजय कुमार सरोज याने सुवर्ण पदक पटकावले.
या चमकदार कामगिरीनंतर बोलताना सुधा म्हणाली, "आॅलिम्पिकनंतर माझा पाच महिने सराव बंद होता, गेल्या डिसेंबरमध्ये मी पुन्हा नॅशनल कॅम्पमध्ये प्रवेश केला आणि हळूहळू सराव सुरु केला. एशियन चॅम्पियनशिपमध्ये पदक मिळवण्याचे माझे ध्येय होते, आता मला पुढील महिन्यातील वर्ल्ड चॅम्पियनशिपमध्ये पदक मिळवायचे आहे.""
पुरुष रिले शर्यतीदरम्याने केलेल्या चुकीमुळे यजमान भारतीय संघाला चमकदार कामगिरीनंतरही स्पर्धेबाहेर पडावे लागले. संघातील एका सदस्याने आपल्या सहकाऱ्याकडून बॅटन घेताना बाजूची लाइन पार केल्याने भारतीय संघाला फटका बसला. जॉन अनुरुप, व्ही. के. ई. दासन, जे. देबनाथ आणि अमिय कुमार मलिक यांचा समावेश असलेला भारतीय संघ फोटो फिनिशमध्ये कोरियाच्या पुढे होता, मात्र खेळाडूंकडून झालेल्या चुकीमुळे नंतर संघाला बाद ठरविण्यात आले. शर्यतीच्या पहिल्या व दुसऱ्या सत्रात भारतासाठी शर्यत सहज ठरली. परंतु, देबनाथ आणि मलिक यांच्यात बॅटन पास करताना गडबड झाली. दरम्यान, या शर्यतीमध्ये कोरियाने ४०.१८ सेकंदाची वेळ देत हीट जिंकली. दुसऱ्या हीटमध्ये चीनने बाजी मारली. चीनी तैपईने ३९.४० सेकंदाची, तर थायलंडने ३९.४८ सेकंदाची वेळ नोंदवली. दुसरीकडे, अनु राघवन, जौना मुरमु आणि एम. अर्पिता यांचा समावेश असलेल्या भारताच्या महिला रिले संघाने ४०० मीटर अडथळा शर्यतीसाठी पात्रता मिळवली.
भारताचा जगतार सिंग डोपिंगमध्ये दोषी
भुवनेश्वर : येथे सुरु असलेल्या आशियाई चॅम्पियन्सशीप अॅथलेटिक्स स्पर्धेत भारताचा प्रमुख डेकाथलीट जगतार सिंग डोपिंग चाचणीमध्ये दोषी आढळल्याने खळबळ माजली. यामुळे भारताच्या मोहिमेला मोठा धक्का बसला आहे. पटियाला येथे राष्ट्रीय उत्तेजक विरोधी संस्थेने (नाडा) गेल्या महिन्यात घेतेलेल्या जगतारच्या युरिन ‘अ’ नमुना मेल्डोनियम चाचणीमध्ये पॉझिटिव्ह आढळला. यामुळे त्याला आता अनिश्चित काळासाठी निलंबित करण्यात आले.
राजस्थानचा खेळाडू असलेल्या जगतारचा ‘ब’ नमुनाही दोषी आढळला, तर मात्र त्याच्यावर जास्तीत जास्त चार वर्षांपर्यंतची बंदी लागली जाऊ शकते. जगतारचा भारताच्या ९५ सदस्यीय संघामध्ये समावेश असून अभिषेक शेट्टीसह त्याला संघात स्थान मिळाले आहे. गुरुवारी सुरु झालेल्या डेकाथलॉनमध्ये केवळ अभिषेकने सहभाग घेतला. ‘नाडा’ने चार दिवसांपुर्वीच याबाबत भारतीय अॅथलेटिक्स महासंघटनेला सुचित केले होते. यानंतर जगतारला भारती़य संघाबाहेर करण्यात आले होते आणि त्यामुळे तो स्पर्धेठिकाणी पोहचू शकला नाही. भारतीय संघाच्या एका पदाधिकाऱ्याए याबाबत सांगितले की, ‘स्पर्धा सुरु होण्याच्या तीन - चार दिवसांपुर्वीच डोपिंग चाचणीमध्ये जगतार दोषी आढळल्याची माहिती मिळाली आणि त्यानंतर आम्ही त्याला संघाबाहेर केले. तो भारतीय संघासोबत भुवनेश्वरला आला नाही.’ जगतारने फेडरेशन कप स्पर्धेत ६८८८ गुणांसह जेतेपद पटकावले होते. तसेच, शेट्टीने ६८१४ गुणांसह दुसरे स्थान पटकावले होते.