शशांक मनोहर आयसीसी चेअरमनपदी बिनविरोध

ज्येष्ठ क्रिकेट संघटक अ‍ॅड. शशांक मनोहर गुरुवारी आंतरराष्ट्रीय क्रिकेट परिषदेचे (आयसीसी) पहिले स्वतंत्र चेअरमन म्हणून बिनविरोध विराजमान झाले आहेत.

दुबई : ज्येष्ठ क्रिकेट संघटक अ‍ॅड. शशांक मनोहर गुरुवारी आंतरराष्ट्रीय क्रिकेट परिषदेचे (आयसीसी) पहिले स्वतंत्र चेअरमन म्हणून बिनविरोध विराजमान झाले आहेत. दोन दिवसांपूर्वीच त्यांनी बीसीसीआय अध्यक्षपदाचा राजीनामा दिला होता.
आयसीसीच्या पूर्ण सदस्यीय बोर्डाने प्रस्तावित घटनात्मक सुधारणेस मंजुरी प्रदान करताच ५८ वर्षांचे मनोहर यांच्या नियुक्तीचा मार्ग मोकळा झाला. ते आयसीसीचे पहिले बिनविरोध स्वतंत्र चेअरमन आहेत. त्यांचा दोन वर्षांचा कार्यकाळ लगेच सुरू झाला. आयसीसी निवडणूक प्रक्रियेअंतर्गत सर्व संचालकांना आजी किंवा माजी संचालकांमधून एका व्यक्तीचे नाव सुचविण्याची मुभा असते. निवडणूक लढविण्यासाठी अर्जावर दोन पूर्णकालीन सदस्यांची स्वाक्षरी अनिवार्य आहे. मनोहर हे या पदासाठी एकमेव उमेदवार होते. त्यामुळे त्यांची बिनविरोध निवड करण्यात आली. निवडणूक प्रक्रिया सांभाळणारे आॅडिट समितीचे स्वतंत्र अध्यक्ष अदनान झैदी यांनी प्रक्रिया पूर्ण झाल्याचे सांगून मनोहर यांच्या नावाची घोषणा केली.
मनोहर हे २००८ ते २०११ या कालावधीत बीसीसीआयचे पहिल्यांदा अध्यक्ष बनले. जगमोहन दालमिया यांच्या निधनानंतर त्यांना आॅक्टोबर २०१५ मध्ये दुसऱ्यांदा अध्यक्षपद बहाल करण्यात आले. याच आधारे ते आयसीसी चेअरमन बनले होते. आयसीसी अध्यक्षपद आता मोडीत निघणार आहे.
आयपीएल स्पॉट फिक्सिंग प्रकरणानंतर क्रिकेटला स्वच्छ आणि पारदर्शी बनविण्याचा निर्धार करणारे मनोहर यांनी सात महिन्यांनंतर बीसीसीआय अध्यक्षपद सोडले. सर्वोच्च न्यायालयाने नेमलेल्या न्या. लोढा समितीच्या शिफारशी लागू करीत बीसीसीआयमध्ये पायाभूत सुधारणा घडून येण्याआधीच मनोहर यांनी स्वत:ला अलिप्त करून घेतल्याबद्दल क्रीडा वर्तुळात चर्चेला ऊत आला आहे. (वृत्तसंस्था)
>‘‘आयसीसीचा स्वतंत्र चेअरमन बनणे माझ्यासाठी गर्वाची बाब आहे. माझ्या क्षमतेवर विश्वास दाखविणाऱ्या आयसीसी संचालकांचा; तसेच बीसीसीआय प्रमुख असताना मला सहकार्य करणाऱ्या सर्वच सहकाऱ्यांचा मनापासून आभारी आहे. २०१४ च्या घटनादुरुस्तीची समीक्षा करीत असताना क्रिकेटचा विकास; तसेच सर्व संलग्न देशांना एका माळेत गुंफण्याची किमया साधत सर्वाधिक श्रीमंत क्रिकेट या खेळाचे भविष्य सुरक्षित ठेवण्याचे काम करायचे आहे.’’
- शशांक मनोहर,
चेअरमन आयसीसी
>कानपूर : आयसीसी चेअरमनपदी बिनरोध निवड झालेल्या शशांक मनोहर
यांचे आयपीएलचे चेअरमन राजीव शुक्ला यांनी अभिनंदन केले. शुक्ला म्हणाले,‘‘मनोहर यांच्या नेतृत्वाखाली क्रिकेट नक्कीच नवी उंची गाठेल.’’ बीसीसीआयच्या अध्यक्षपदी कुणाची वर्णी लागणार, याबाबत शुक्ला म्हणाले, की याबाबत अद्याप कुठला निर्णय घेण्यात आलेला नाही.
नवी दिल्ली : शशांक मनोहर यांची बिनविरोध निवड भारतासाठी ही अभिमानाची गोष्ट आहे. आपल्या प्रशासकीय अनुभवाच्या जोरावर आयसीसीच्या माध्यमातून क्रिकेटला जागतिक पातळीवर ते एका नव्या उंचीवर पोहोचवतील. त्यांच्या प्रशासकीय अनुभवाचा आयसीसीला नक्कीच फायदा होईल, असे वक्तव्य बीसीसीआयचे सचिव अनुराग ठाकूर यांनी मनोहर यांच्या आयसीसी अध्यक्षपदाच्या कार्यासाठी शुभेच्छा देताना व्यक्त केले.