सायना फायनलमध्ये

गत चॅम्पियन आणि स्पर्धेत अव्वल मानांकन प्राप्त भारताच्या सायना नेहवालने आपला विजयी धडाका कायम राखताना सय्यद मोदी आंतरराष्ट्रीय बॅडमिंटन स्पर्धेच्या फायनलमध्ये प्रवेश केला़

लखनौ : गत चॅम्पियन आणि स्पर्धेत अव्वल मानांकन प्राप्त भारताच्या सायना नेहवालने आपला विजयी धडाका कायम राखताना सय्यद मोदी आंतरराष्ट्रीय बॅडमिंटन स्पर्धेच्या फायनलमध्ये प्रवेश केला़ पुरुष गटातील अंतिम फेरीत भारताचा के़ श्रीकांत आणि पी़ कश्यप अजिंक्यपदासाठी एकमेकांशी झुंजतील़
महिला एकेरी गटात जागतिक क्रमवारीत तिसऱ्या स्थानावर असलेल्या सायना नेहवालने स्पर्धेतील कामगिरीत सातत्य राखताना उपांत्य फेरीच्या लढतीत तृतीय मानांकित थायलंडच्या निचोन जिंदापोन हिच्यावर अवघ्या ४० मिनिटांत २१-१०, २१-१६ असा विजय मिळवून थाटात फायनलमध्ये आपला प्रवेश निश्चित केला़ पुरुष एकेरीच्या उपांत्य फेरीत अव्वल मानांकन प्राप्त श्रीकांतने आपल्याच देशाच्या चौथ्या मानांकनप्राप्त एचएस प्रणयला ६२ मिनिटांत १२-२१, २१-१२, २१-१४ अशा फरकाने धूळ चारून फायनल गाठली़
अन्य सेमीफायनलमध्ये तृतीय मानांकनप्राप्त पी़ कश्यप याने
द्वितीय मानांकनप्राप्त
डेन्मार्कच्या व्हिक्टर एक्सेलसनवर
१ तास आणि ५ मिनिटांत
१८-२१, २२-२०, २१-७ अशी मात करून अंतिम फेरी गाठली़ आता कश्यम आणि श्रीकांत ही जोडी फायनलमध्ये जेतेपदासाठी आमनेसामने येईल.
दरम्यान, पुरुष दुहेरीत गटातील उपांत्य लढतीत पाचवे मानांकनप्राप्त मनू अत्री आणि बी. सुमीत रेड्डी या भारतीय जोडीने चौथे मानांकनप्राप्त रशियाच्या व्लादिमीर इव्हानोव्ह आणि इवान सोजोनोव्हवर केवळ ३० मिनिटांत २१-१२ आणि २१-१८ अशा फरकाने विजय मिळवून अंतिम फेरीत प्रवेश केला़ (वृत्तसंस्था)

या लढतीत सायनाने दुसऱ्या गेममध्ये ८-१० ने पिछाडीवर पडल्यानंतर सलग ६ गुणांची कमाई करताना १४-१० अशी आघाडी घेतली आणि त्यानंतर सहज हा गेम नावे करून सलग दुसऱ्यांदा स्पर्धेची फायनल गाठली़