नव्या मोसमासाठी नयन चॅटर्जी सज्ज

भारताचा उदयोन्मुख रेसर नयन चॅटर्जी याने नुकताच मलेशिया येथे झालेल्या आशिया मॅक्स चॅम्पियनशिपमध्ये उपविजेतेपद पटकावून रेसिंग जगतात अभिमानाने तिरंगा फडकावला

मुंबई : भारताचा उदयोन्मुख रेसर नयन चॅटर्जी याने नुकताच मलेशिया येथे झालेल्या आशिया मॅक्स चॅम्पियनशिपमध्ये उपविजेतेपद पटकावून रेसिंग जगतात अभिमानाने तिरंगा फडकावला. यानंतर, आपल्या पुढील रेसिंगसाठी तो सज्ज झाला असून, आता २०१६-१७ मोसमासाठी त्याला भारताचे आघाडीचे रेसिंग गुरु अकबर इब्राहिम यांचे मार्गदर्शन मिळणार आहे. आपल्या आगामी मोहिमेची माहिती देण्यासाठी, मुंबई आयोजित करण्यात आलेल्या कार्यक्रमात या वेळी भारतीय क्रिकेट संघाचे माजी कर्णधार मोहम्मद अझरुद्दिन यांनी नयनला शुभेच्छा दिल्या.
३० एप्रिल व १ मे दरम्यान झालेल्या दोनदिवसीय मलेशिया केआरएस - केकेएस एशिया रोटॅक्स मॅक्स चॅलेंज स्पर्धेत नयनने शानदार कामगिरी करताना सर्वांचे लक्ष वेधले. यानंतर, पुढील स्पर्धेसाठी त्याला इब्राहिम यांचे मार्गदर्शन मिळणार आहे. दखल घेण्याची बाब म्हणजे, भारताचे दोन आघाडीचे एफ वन रेसर नरेन कार्तिकेयन व करुण चंडोक यांनी आपल्या उमेदीच्या काळात इब्राहीम यांच्याकडून प्रशिक्षण घेतले आहे.
वयाच्या १८व्या वर्षीय आंतरराष्ट्रीय कार्ट रेसर म्हणून स्वत:ची छाप पाडलेल्या नयनने आतापर्यंत एकूण २८ राष्ट्रीय ट्रॉफीवर कब्जा केला आहे. नयनच्या कामगिरीचे कौतुक करताना अझरुद्दिन यांनी सांगितले की, ‘रेसिंगविश्वात नयन भारताचे भविष्य आहे. या खेळामध्ये सर्व तरुणाईसाठी तो प्रेरणादायी ठरेल. त्याची तंदुरुस्ती जबरदस्त आहे.’’ (क्रीडा प्रतिनिधी)