Men’s Asian Champions Trophy in Dhaka- बांगलादेश येथे सुरू असलेल्या आशियाई चॅम्पियन्स ट्रॉफी स्पर्धेत भारतानं शुक्रवारी कट्टर प्रतिस्पर्धी पाकिस्तानवर 3-1 असा दणदणीत विजय मिळवला. भारतानं या विजयासह उपांत्य फेरीतील स्थान पक्के केले आहे. भारताकडून हरमनप्रीतने उल्लेखनीय कामगिरी करताना दोन गोल केले, तर आकाशदीपनं एक गोल केला. पाकिस्तानकडून एकमेव गोल जुनैद मंजूर यानं केला. भारतानं मागील सामन्यात बांगलादेशवर 9-0 असा मोठा विजय मिळवला होता अऩ् आत पाकिस्तानला पराभवाची चव चाखवली.
पहिल्या क्वार्टरमध्ये भारतीय खेळाडूंनी सामन्यावर मजबूत पकड घेतली. त्यामुळे 7व्या मिनिटाला पेनल्टी कॉर्नर मिळाला आणि त्यावर हरमनप्रीतनं गोल करून 1-0 अशी आघाडी मिळवून दिली. दुसऱ्या क्वार्टरमध्येही भारतीयांनी चेंडूवर ताबा राखताना पाकिस्तानवर दडपण निर्माण केलं होतं. पण, भारताच्या नीलम संजीवकडून फाऊल झाला आणि त्याला दोन मिनिटांसाठी मैदानाबाहेर बसावं लागलं. 10 खेळाडूंसह खेळणारा भारतीय संघ तरीही पाकिस्तानवर भारी पडला. भारतानं पहिल्या हाफमध्ये 1-0 अशी आघाडी कायम राखली. तिसऱ्या क्वार्टरच्या पहिल्या पाच मिनिटांत भारतानं पाकिस्तानच्या गोलक्षेत्रात आक्रमण सुरू केले, परंतु त्यांना यश मिळत नव्हते. अखेर 42व्या मिनिटाला आकाशदीपनं अप्रतिम गोल करून भारताची आघाडी 2-0 अशी मजबूत केली. पण, 44व्या मिनिटाला पाकिस्तानकडून जुनैदनं गोल केला अन् पिछाडी 1-2 अशी कमी केली.