कॅरम : निलम - घुफ्रान यांनी पटकावले जेतेपद

मोहम्मद घुफ्रानने पंकज पवारला तीन सेटपर्यंत रंगलेल्या लढतीत १३-२२, २५-४, २५-११ असे पराभूत करून विजेतेपद पटकाविले.

मुंबई डिस्ट्रिक्ट कॅरम असोसिएशन व रिझर्व्ह बँक स्पोर्ट्स क्लब यांच्या संयुक्त विद्दमाने संपन्न झालेल्या ९ व्या कार्याध्यक्ष चषक स्पर्धेच्या पुरुष एकेरी गटात अंतिम फेरीत इंडियन ऑईलचा मोहम्मद घुफ्रानने जैन इरिगेशनच्या पंकज पवारला तीन सेटपर्यंत रंगलेल्या लढतीत १३-२२, २५-४, २५-११ असे पराभूत करून विजेतेपद पटकाविले. तर महिलांच्या अंतिम सामन्यात जैन इरिगेशनच्या निलम घोडकेने बाजी मारली. तिने अनुभवी रिझर्व्ह बँकेच्या संगीता चांदोरकरवर २५-१, १८-२५ व १५-७ असा निसटता विजय मिळविला. १८ वर्षांखालील मुलांमध्ये अंतिम सामन्यात महाराष्ट्र कामगार कल्याण मंडळाच्या ओजस जाधवने ए के फाऊंडेशनच्या निलांश चिपळूणकरला ६-१५, १३-१०, १२-८ असे नमविले. तर दुसरीकडे १८ वर्षाखालील मुलींमध्ये अंतिम लढतीत महाराष्ट्र कामगार कल्याण मंडळाच्या सेजल लोखंडेच्या एस एस ग्रुपच्या सिमरन शिंदेला २१-०, १६-६ असे सहज पराभूत करून विजेतेपदावर शिक्कमोर्तब केले. सर विजेत्यांना रिझर्व्ह बँकेचे रिजनल मॅनेजर बी. के. मिश्रा यांच्या हस्ते रोख पारितोषके व कार्याध्यक्ष चषक देऊन गौरविण्यात आले. याप्रसंगी रिझर्व्ह बँकेचे उपमहाव्यवस्थापक जडेजा, क्रीडा सचिव श्रीधर कोरगांवकर, मुंबई डिस्ट्रिक्ट कॅरम असोसिएशनचे मानद सरचिटणीस यतिन ठाकूर व खजिनदार अरुण केदार उपस्थित होते. स्पर्धेच्या यशस्वी आयोजनासाठी अजय आंब्रे यांनी विशेष मेहनत घेतली.