लाचखोर फिफा अधिका-यांना अटक, एफबीआय व स्विस प्रशासनाची कारवाई

 

झुरीच,(स्वीत्झर्लंड) दि. २७ - फिफा वर्ल्डकपमध्ये लाचखोरी केल्याचा आरोप ठेवत सात अधिका-यांवर कारवाई करण्यात आली आहे. 

ही कारवाई अमेरिकेतील एफबीआय व स्वित्झर्लंड पोलिसांनी एकत्र केली आहे. या प्रकरणी प्रसिद्धीसाठी काही मीडिया कंपन्यांना हक्क देण्यात आल्याने त्यांच्यावरही लाचखोरीचा गुन्हा दाखल करण्यात आला आहे. आरोप असलेले अधिकारी व कंपन्यांची अमेरिका व स्वित्झर्लंड सरकार स्वतंत्र चौकशी करणार आहेत. 

अमेरिकन प्रशासनाने दिलेल्या माहितीनुसार फुटबॉलशी संबंधित नऊ जणांना ताब्यात घेतले असून पाच मीडिया कंपन्यांवर तब्बल १५ कोटी रुपयांच्या भ्रष्टाचाराचा आरोप आहे. एफबीआयने स्वित्झर्लंडमधून सात अधिका-यांना अटक केली आहे. यामध्ये फिफाचे उपाध्यक्ष जेफ्री वेब यांचाही समावेश आहे. फुटबॉल सारख्या पारंपारिक खेळाला या घटनेमुळे कलंक लागला असल्याचे एफबीआयचे संचालक जेम्स कोमी यांनी सांगितले. एफबीआय व स्वित्झर्लंड पोलिसांनी झुरीचमधील एका हॉटेलमध्ये सापळालावून या अधिका-यांना अटक केली. या प्रकरणाचा कट अमेरिकेत शिजला असून पैशाची देवाण घेवाणही अमेरिकन बँकेतूनच झाल्याने अमेरिकन प्रशासनाने स्वित्झर्लंड सरकारकडे या प्रकरणी कारवाईची विनंती केली होती.