लोकमत न्यूज नेटवर्क, नवी मुंबई: वाशी येथील फादर ॲग्नेल शाळेच्या तरण तलावात अकरावीत शिकणाऱ्या १७ वर्षीय विद्यार्थ्याचा बुडून मृत्यू झाला. ही दुर्घटना शनिवारी दुपारी अडीच वाजण्याच्या सुमारास घडली. मयूर आदिनाथ डमाळे असे विद्यार्थ्याचे नाव असून, तो नेरुळ येथे राहत होता. विद्यार्थ्यांना स्विमिंगचे प्रशिक्षण दिले जात आहे. त्यासाठी तीस ते चाळीस विद्यार्थी स्विमिंगच्या तासासाठी आले होते. इतर मुलांप्रमाणे मयूरनेही स्विमिंग पूलमध्ये उडी मारली.
परंतु, तो बराच वेळ बाहेर आला नाही. त्यामुळे प्रशिक्षक, शिक्षक आणि इतर विद्यार्थ्यांनी शोधाशोध सुरू केली असता, तो मृतावस्थेत आढळला. या घटनेची माहिती मिळताच वाशी पोलिस व अग्निशमन दलाचे जवान घटनास्थळी दाखल झाले. अग्निशमन दलाच्या जवानांनी त्याचा मृतदेह बाहेर काढला. या प्रकरणी रात्री उशिरापर्यंत पोलिस ठाण्यात नोंद करण्याची प्रक्रिया सुरू होती.