पोलिसांची २८ हुक्का पार्लरवर कारवाई

महामुंबईची तरुणाई हुक्क्याच्या गर्तेत असल्याचे लोकमतने उघडकीस आणल्यानंतर पोलिसांनी २८ हुक्का पार्लरवर कारवाई केली

सूर्यकांत वाघमारे /लोकमत न्यूज नेटवर्क
नवी मुंबई : महामुंबईची तरुणाई हुक्क्याच्या गर्तेत असल्याचे लोकमतने उघडकीस आणल्यानंतर पोलिसांनी २८ हुक्का पार्लरवर कारवाई केली आहे. मात्र यानंतरही काही हुक्का पार्लर सुरु असून त्यांचे मालक काही शासकीय अधिकाऱ्यांचे नातलग आहेत. यामुळे हुक्का पार्लरसंबंधी ठोस कायदाच नसल्याचा आधार घेत त्यांच्याकडून पोलिसांनाच ज्ञान पाजळवले जात आहे.
नवी मुंबई पोलीस आयुक्तालय क्षेत्रात हुक्का संस्कृती फैलावत चालली असून, त्यामुळे तरुणाई नशेच्या आहारी जात आहे. विशेष बाब म्हणजे मागील आठ ते दहा महिन्यांत हे हुक्का पार्लरचे प्रमाण सर्वाधिक वाढले आहे. अगदी पहाटेपर्यंत हे हुक्का पार्लर चालत असून त्याठिकाणी तरुण- तरुणी हुक्क्याचा दम मारत बसत आहेत. त्यापैकी बहुतांश हुक्का पार्लर पालिकेच्या गुमास्ता, हॉटेल परवान्याच्या नावाखाली चालत आहेत. मात्र हुक्क्याच्या तलपेने रात्री अपरात्री घराबाहेर फिरणाऱ्या तरुण- तरुणींमुळे शहरात कायदा व सुव्यस्थेचा गंभीर प्रश्न निर्माण झालेला आहे. हीच बाब लोकमतने शहरातील हुक्का पार्लरचे स्टिंग आॅपरेशन करुन उघड केली होती. लोकमतच्या या दणक्यानंतर खडबडून झालेल्या पोलीस यंत्रणेने अखेर सर्वच हुक्का पार्लरची झाडाझडती घेवून कारवाईला सुरवात केली आहे. त्यानुसार २८ हुक्का पार्लरवर कारवाई झाली आहे. त्यामध्ये अवघ्या एपीएमसी पोलिसांनी १९ कारवाया झाल्या असून वाशी पोलिसांनी ६, नेरुळ पोलिसांनी दोन तर कोपरखैरणे पोलिसांनी एक कारवाई केली आहे. तर कारवाईच्या निमित्ताने काही हुक्का पार्लरच्या ठिकाणी गेलेल्या पोलिसांना विरोधाला देखील सामोरे जावे लागले.
सुरु असलेल्या हुक्का पार्लरपैकी काही शासकीय सेवेत कार्यरत असलेल्या अधिकाऱ्यांच्या नातलगांचे आहेत. यामुळे स्थानिक पोलीस त्याठिकाणी कारवाईला जाताच त्यांच्यावर शासकीय सेवेतील उच्च पदस्थ अधिकाऱ्यांचा दबाव येत असल्याचीही चर्चा आहे. त्यामुळे हुक्का पार्लरवर नियंत्रणासाठी शासनाने विशेष कायदा करण्याची गरज व्यक्त होत आहे. राज्य शासनाने २०११ मध्ये हुक्का पार्लर बंदीचे सकारात्मक पाऊल उचलले होते. यावेळी शासनाच्या भूमिकेविरोधात झालेल्या याचिकेनंतर न्यायालयाने हुक्का पार्लरसाठी नियमावली आखून दिली आहे. तर सिगारेट आणि इतर पदार्थ कायद्याअंतर्गत (कोप्ता) पोलिसांना कारवाईचे अधिकार दिले आहेत. परंतु या नियमावलीत हुक्का पार्लर चालकाने नियमभंग केल्यास साधारण दोनशे रुपये दंडाची तरतूद असल्याचे एका पोलीस अधिकाऱ्याने सांगितले. यामुळे हुक्का पार्लर चालकांवर कायद्याचा धाक राहत नसून सर्रास नियमांचे उल्लंघन होत असल्याचे पाहायला मिळत आहे.