Navi Mumbai Marathi News | नवी मुंबई मराठी बातम्या | Latest Navi Mumbai News in Marathi | नवी मुंबई ताज्या बातम्या | Navi Mumbai Crime Marathi News | नवी मुंबई ब्रेकिंग न्यूज़| Breaking & Live Navi Mumbai News

जयंत धुळप, अलिबागराष्ट्रीय महामार्ग प्राधिकरणास गोवा राष्ट्रीय महामार्गावरील पळस्पे ते इंदापूर दरम्यानच्या टप्प्यातील खड्डे बुजवून महामार्ग बिनधोक करण्यात अद्याप यश आले नसले तरी रायगड पोलीस दलाने या गोष्टीचा बाऊ न करता कोकणात जाणाऱ्या गणेशभक्तांना प्रवासादरम्यान कोणत्याही प्रकारचे विघ्न येणार नाही याकरिता कंबर कसून वाहतूक नियोजन केले आहे. गोवा महामार्गावर पेण ते पोलादपूर दरम्यान एकूण ३० सीसीटीव्ही कॅमेरे तैनात करण्यात आले असून, त्या माध्यमातून वाहतुकीचे नियंत्रण करण्यात येणार असल्याची माहिती रायगड जिल्हा पोलीस अधीक्षक मो.सुवेझ हक यांनी दिली आहे.गोवा राष्ट्रीय महामार्गावर पहिल्या टप्प्यात, पेण पोलीस ठाण्याच्या हद्दीत हमरापूर फाटा पोलीस मदत केंद्र येथे दोन, पेण-खोपोली बायपास येथे तीन, अंतोरा फाटा येथे दोन आणि रामवाडी पोलीस चौकी येथे दोन अशा या पाच ठिकाणी एकूण नऊ सीसीटीव्ही कॅमेरे बसविण्यात आले आहेत. हमरापूर-रामवाडी या टप्प्यातील वाहतूक या ९ कॅमेऱ्यांमुळे पेण पोलिसांच्या दृष्टिक्षेपात राहू शकणार आहे. दुसऱ्या टप्प्यात नागोठणे पोलीस ठाण्याच्या क्षेत्रात वाकण पोलीस मदत केंद्राच्या अंतर्गत तीन कॅमेरे तैनात करण्यात आले आहेत. वडखळ ते नागोठणे-वाकण या टप्प्यातील वाहतूक नियंत्रण या कॅमेऱ्यांच्या माध्यमातून करण्यात येणार आहे.तिसऱ्या टप्प्यात माणगाव पोलीस ठाण्यांतर्गत,इंदापूर एसटी स्टॅन्ड येथे तीन, माणगाव एसटी स्टॅन्ड येथे तीन आणि मोर्बा नाका येथे तीन अशा नऊ कॅमेऱ्यांच्या माध्यमातून इंदापूर ते मोर्बा नाका या टप्प्यातील वाहतुकीवर नजर ठेवता येणार आहे. चौथ्या टप्प्यात गोरेगाव पोलीस ठाण्यांतर्गत लोणेरे पोलीस चौकी येथे तीन कॅमेरे तैनात करण्यात आले आहेत. तर पाचव्या टप्प्यात महाड शहर पोलीस ठाण्यांतर्गत नातेखिंड मदत केंद्र येथे दोन आणि विसावा हॉटेल नाका येथे दोन असे चार कॅमेरे तैनात करण्यात आले आहेत. माणगांव येथे लोखंडी बॅरिकेट्स लावून खरेदीकरिता कोणत्याही वाहनास थांबू दिले जाणार नसल्याचे हक यांनी स्पष्ट केले आहे. अखेरच्या सहाव्या टप्प्यात पोलादपूर पोलीस ठाण्यांतर्गत पोलादपूर शहरातील शिवाजी पुतळ््याजवळ दोन कॅमेरे तैनात करण्यात आले आहेत. महाडकडून रत्नागिरी, महाडकडून महाबळेश्वर या दोन्ही मार्गावरील ये-जा करणाऱ्या वाहनांवर या कॅमेऱ्यांच्या माध्यमातून लक्ष ठेवता येणार आहे.बेदरकारपणे वाहन चालविणे, विनाकारण आणि धोकादायक पद्धतीने ओव्हरटेक करणे, वाहतुकीस अडथळा निर्माण करणे अशा घटना घडू नयेत याकरिता या कॅमेऱ्यांच्या माध्यमातून बारकाईने चोवीस तास निरीक्षण करण्यात येणार आहे. अशा प्रकारचा अनुचित प्रकार दिसून आल्यास तत्काळ सीसीटीव्ही निरीक्षण कक्षातून महामार्गावर तैनात वाहतूक पोलीस जीप व रायडर्स यांना वायलेसवरुन सूचना देण्यात येईल. प्रत्यक्ष घटनास्थळावरील परिस्थिती नियंत्रणात आणण्यात येईल असे नियोजन करण्यात आले आहे. दुर्दैवाने एखादे वाहन रस्त्यात बंद पडले तर ते तेथून खेचून बाजूला घेवून जाण्याचीही व्यवस्था करण्यात आली आहे.

Navi Mumbai (Marathi News)