कार्यशाळेत श्रींच्या मूर्तींवर अखेरचा हात

गणेशाच्या आगमनाकरिता अवघे काहीच दिवस शिल्लक राहिले असून शहरातील चित्रशाळांमध्ये बाप्पाच्या मूर्तीवर शेवटचा हात फिरवला जात आहे.

प्राची सोनवणे,  नवी मुंबई
गणेशाच्या आगमनाकरिता अवघे काहीच दिवस शिल्लक राहिले असून शहरातील चित्रशाळांमध्ये बाप्पाच्या मूर्तीवर शेवटचा हात फिरवला जात आहे. माती, रंग, प्लास्टर आॅफ पॅरिस आदी कच्च्या मालाच्या किमती वाढल्याने मागील वर्षीच्या तुलनेत मूर्तींमध्ये २० टक्के दराने वाढ झाली आहे. गणेशचतुर्थीच्या महिनाभर आधीच मूर्तीच्या बुकिंगला सुरुवात होते. मूर्तीचे डोळे, दागिने आदि रंगरंगोटीचे काम सुरु आहे.
मूर्ती तयार करण्यासाठी लागणाऱ्या साहित्याच्या किमती वाढल्याने मूर्तिकारांनी मजुरीमध्ये २०० ते २५० रुपयांनी वाढ केली आहे. इको फ्रेंडली गणेशोत्सव साजरा करण्यासाठी सर्वच भागांतून शाडूच्या गणेशमूर्तींना मोठ्या प्रमाणात मागणी आहे. मागील वर्षी २०० ते २५० रुपये दराने विकली जाणारी शाडूच्या मातीची गोण यंदा ३५० ते ४०० रुपये दराने मिळत आहे. शाडूच्या मूर्तींच्या किमतींमध्ये झालेली वाढ तसेच हाताळण्यास नाजूक असल्याने मोठमोठ्या गणेशोत्सव मंडळांकडून मात्र अजून प्लास्टर आॅफ पॅरिसच्या मूर्तींनाच मागणी असल्याची माहिती मूर्तिकारांनी दिली आहे. मूर्तीसाठी वापरले जाणारे सोनेरी, चंदेरी रंगांच्या किमती वाढल्या आहेत. विविध रूपातील मूर्ती तयार करून घेण्यासाठी भाविकांनी सहा महिने अगोदरही मूर्तींचे बुकिंग केले आहे.

1नवी मुंबईतील सायली कला केंद्र या चित्रशाळेत सध्या तिसरी पिढी श्री मूर्ती घडवित आहे. तरुण मूर्तिकारांनी आजोबांकडून मूर्ती घडविण्याचे धडे घेतले असून अभियांत्रिकी, एमबीए, पदवी शिक्षणानंतरही मूर्ती साकारात आहे. पिढ्यानपिढ्या मूर्ती घडवित असल्याने घरातील प्रत्येक व्यक्ती मूर्ती घडविण्याच्या कामात सहभागी असल्याची प्रतिक्रिया मूर्तिकार जनार्दन नाईक यांनी व्यक्त केली.

2पर्यावरण संवर्धनाच्या दृष्टीने गेली कित्येक वर्षे या चित्रशाळेत शाडूच्या मातीपासून मूर्ती तयार केल्या जात आहेत. सण, उत्सव साजरे करताना आजूबाजूच्या पर्यावरणावर त्याचा वाईट परिणाम होणार नाही याची दक्षता घेणे ही प्रत्येक नागरिकाचे कर्तव्य असल्याचा मोलाचा सल्ला मूर्तिकार नाईक यांनी दिला.