नवी मुंबई : हार्बर मार्गावरील लोकलचा अपघात घडवण्याचा प्रयत्न झाल्याची बाब जुईनगर येथे उघडकीस आली. रेल्वेचा ट्रॅक बदलण्याच्या ठिकाणच्या दोन रुळामध्ये अज्ञाताने लोखंडी रॉड अडकवला होता. यामुळे सिग्नल पडत नसल्याने कर्मचाऱ्यांकडून झालेल्या पाहणीत हा प्रकार उघड झाला.
हार्बर मार्गावर पनवेलकडे जाणाºया रेल्वेमार्गावर जुईनगर रेल्वेस्थानकालगत हा प्रकार घडला. जुईनगर स्थानकातून पनवेलच्या दिशेने जाणाºया लोकलला ट्रॅक बदलण्याच्या ठिकाणी सिग्नल मिळत नव्हता. यामुळे पनवेलकडे जाणाºया लोकल एकापाठोपाठ एक थांबविण्यात आल्या होत्या. या वेळी रेल्वेच्या कामगारांनी सदर परिसरातील रुळाची पाहणी केली असता, ट्रॅक बदलण्याच्या ठिकाणी दोन रुळामध्ये रॉड अडकवलेला असल्याचे दिसून आले. त्यामुळे रुळ एकमेकांना जुळत नसल्याने सिग्नल मिळण्यात अडथळा निर्माण झाला होता. तर पुढे जाण्यासाठी सिग्नल मिळत नसल्याने लोकल थांबवण्यात आल्या होत्या. हा प्रकार निदर्शनास आल्यानंतर रुळात अकडकवलेला रॉड काढून लोकलच्या मार्गातील अडथळा दूर करण्यात आला. सदर प्रकार लोकलचा अपघात घडवण्याच्या उद्देशाने जाणीवपूर्वक केला गेल्याची शक्यता वर्तवली जात आहे. मात्र, मोटरमनच्या सतर्कतेमुळे लोकलची संभाव्य दुर्घटना टळली आहे. जुईनगर रेल्वेस्थानक परिसरात रात्री गर्दुल्ल्यांचा वावर असतो. त्यांच्याकडूनच हा प्रकार केला गेल्याचीही शक्यता आहे. सदर घटनेची नोंद रेल्वे पोलिसांकडे करण्यात आली आहे.