‘त्या’ शौचालयावर अखेर हातोडा

स्थानिक रहिवाशांचा तीव्र विरोध असलेल्या खांदा कॉलनीच्या सेक्टर ९ मधील ‘त्या’ अनधिकृत शौचालयावर शनिवारी अखेर सिडकोने कारवाई केली.

नवी मुंबई : स्थानिक रहिवाशांचा तीव्र विरोध असलेल्या खांदा कॉलनीच्या सेक्टर ९ मधील ‘त्या’ अनधिकृत शौचालयावर शनिवारी अखेर सिडकोने कारवाई केली. शनिवारी झालेल्या कारवाईला फेरीवाल्यांनी तीव्र विरोध केला. परंतु सिडकोच्या पथकाने कडेकोट पोलीस बंदोबस्तात शौचालयावर हातोडा मारला. शुक्रवारी सिडकोने याच परिसरातील अनधिकृतपणे व्यवसाय करणाऱ्या फेरीवाल्यांवरही कारवाई केली होती.
खांदा कॉलनीतील सेक्टर ९ परिसरात रायगड मिनी नावाचे एक मार्केट आहे. या मार्केटमध्ये फेरीवाल्यांनी मोठ्या प्रमाणात अतिक्रमण केले आहे. या फेरीवाल्यांना अभय देण्याचे काम शेकापच्या एका स्थानिक पदाधिकाऱ्याकडून केले जात आहे. या पदाधिकाऱ्याने येथील फेरीवाल्यांच्या सोयीसाठी मार्केटच्या जवळच असलेल्या एका खासगी गृहनिर्माण सोसायटीच्या संरक्षक भिंतीला लागून अनधिकृत शौचालय उभारले आहे. या शौचालयाच्या दुर्गंधीचा त्रास या सोसायटीतील रहिवाशांना होत आहे. यासंदर्भात येथील रहिवाशांनी अनेकदा सिडकोकडे तक्रारी केल्या आहेत. रहिवाशांच्या वतीने यासंदर्भात सिडकोचे व्यवस्थापकीय संचालक संजय भाटिया यांना सह्यांचे निवेदनही देण्यात आले होते. त्यानुसार गेल्या महिन्यात सिडकोने या शौचालयावर कारवाई करून त्यावरील केवळ सिमेंटचे पत्रे काढले होते. याचा परिणाम म्हणून काही दिवसांत पुन्हा पत्रे टाकून या शौचालयाचा वापर सुरू करण्यात आला होता. त्यामुळे रहिवाशांनी संताप व्यक्त केला होता. यासंदर्भात ‘लोकमत’च्या हॅलो नवी मुंबई पुरवणीत सविस्तर वृत्त प्रसिद्ध करण्यात आले होते. या वृत्ताची दखल घेत सिडकोचे व्यवस्थापकीय संचालक संजय भाटिया यांनी हे शौचालय जमीनदोस्त करून त्याची जागा ताब्यात घेण्याचे आदेश संबंधित विभागाला दिले होते. त्यानुसार सिडकोच्या अतिक्रमण विभागाने शनिवारी या विभागात पुन्हा मोहीम राबवून अनधिकृत शौचालयावर कारवाई केली. (प्रतिनिधी)