नारायण जाधव,नवी मुंबई : महाराष्ट्र किनारपट्टी प्रभाग व्यवस्थापन प्राधिकरणाने (एमसीझेडएमए) अटी व शर्तींच्या अधिन राहून सीआरझेड क्षेत्रावर उभारल्या जाणाऱ्या बालाजी मंदिराला मंजुरी दिली आहे. ती देताना किनारपट्टी प्रभाग व्यवस्थापन आराखड्याला (सीझेडएमपी) विचाराधीन घेतले आहे. परंतु, पर्यावरणवाद्यांनी या मंजुरीला विरोध दर्शविला आहे.
मंदिर भूखंडाच्या सभोवती ५० मीटर एवढा खारफुटींचा बफर झोन असून, हा भाग सीआरझेड-१ मध्ये अंतर्भूत होतो. तरीदेखील एमसीझेडएमए इथे कुंपणाच्या भिंती आणि लॉन्सच्या बांधकामासाठी परवानगी दिली आहे. बफर झोनमध्ये खरंतर कोणताही अडथळा आणता कामा नये, असे नॅटकनेक्ट फाउंडेशनचे संचालक बी. एन. कुमार म्हणाले. दि. २ नोव्हेंबर रोजी एमसीझेडएमएद्वारे घेतलेल्या १७०व्या बैठकीची मिनिट्स एमसीझेडएमएच्या वेबसाइटवर नुकतेच अपलोड झाली आहेत.
याबाबत कुमार म्हणाले की, विस्तीर्ण आंतरभरती पाणथळ क्षेत्रे आणि दलदलींच्या व्यतिरिक्त संपूर्ण ४०,००० चौ. मीटर आकारमानाचा भूखंड मुंबई ट्रान्स हार्बर लिंकच्या तात्पुरत्या स्वरूपाच्या कास्टिंग यार्डमधून घेतला आहे. हे कास्टिंग यार्ड स्वतः १६ हेक्टर क्षेत्रावर खारफुटींची कत्तल करून उभारल्याचे वास्तव एमसीझेडएमएने दुर्लक्षित केले आहे. हा भराव काढून खारफुटी, पाणथळ क्षेत्रे आणि दलदलींसह पाच वर्षांआधीच्या त्याच्या मूळ स्वरूपात पुनर्स्थापित करणे आवश्यक असल्याचे ते म्हणाले.
या मंदिराच्या भूखंडाच्या वाटपाला त्यानी आधीच राष्ट्रीय हरित न्यायाधिकरणामध्ये (एनजीटी) आव्हान दिले आहे. दुसरी आणखीन एक ठळक बाब म्हणजे सीझेडएमपीला केंद्राद्वारे मंजूर करण्यात आले आहे. भूखंडाच्या आराखड्यामधून जाणारी पूररेषा यामध्ये स्पष्ट दाखविली असूनदेखील एमसीझेडएमएने याकडे सपशेल दुर्लक्ष केले आहे, याकडे कुमार यांनी लक्ष वेधले.
इन्स्टिट्यूट ऑफ रिमोट सेन्सिंग (आयआरएस) अण्णा विद्यापीठ-चेन्नईद्वारे तयार केलेल्या सीआरझेड आराखड्याप्रमाणे, हे स्थळ अंशत: स्वरूपात सीआरझेड१एमध्ये (२,७४८.१८ चौ.मीटर), तसेच अंशत: स्वरूपात सीआरझेड२मध्ये (७,७२९.२८ चौ.मीटर) आणि सीआरझेड क्षेत्राबाहेर (२९,५२३ चौ.मीटर) आहे. प्रकल्प प्रास्ताविकांना बफर झोनमध्ये बागेचे/लॅंडस्केपिंगचे आणि कुंपणाच्या भिंतीचे काम विस्तारण्याची इच्छा होती.