गॅसवाहिनीचे काम पूर्ण

सिडको वसाहतीत महानगर गॅसच्या माध्यमातून वाहिन्यांद्वारे गॅस पुरविण्याचा प्रस्ताव आहे. त्यानुसार पनवेल परिसरात ठिकठिकाणी गॅसवाहिन्या टाकण्याचे काम सुरू आहे.

अरुणकुमार मेहत्रे, कळंबोली
सिडको वसाहतीत महानगर गॅसच्या माध्यमातून वाहिन्यांद्वारे गॅस पुरविण्याचा प्रस्ताव आहे. त्यानुसार पनवेल परिसरात ठिकठिकाणी गॅसवाहिन्या टाकण्याचे काम सुरू आहे. इतर ठिकाणी खोदकाम करून वाहिन्या टाकण्यात आल्या असल्या तरी खाडी प्रवण क्षेत्रात कांदळवनांमुळे अनेक अडचणी येत होत्या. कांदळवने वाचविण्यासाठी कोपरा खाडीच्या खालून पाइपलाइन ‘ट्रेज लेस’ तंत्रज्ञानाचा वापर करण्यात आला असून हे काम पूर्णत्वास आले आहे. यामुळे कांदळवनांची हानी टळली आहे. त्यामुळे लवकरच सिडको वसाहतीतील रहिवाशांना पाइपद्वारे गॅस पुरवठा होण्याचा मार्ग मोकळा झाला आहे.
पनवेलची लोकसंख्या साडेआठ लाखांवर पोहचली आहे. याठिकाणी होऊ घातलेल्या आंतरराष्ट्रीय विमानतळामुळे महानगराच्या दृष्टीने शहराची वाटचाल सुरू करण्यात आली आहे. त्यामुळे परिसरात विविध पायाभूत सुविधांचे जाळे पसरविण्याचे काम हाती घेण्यात आले आहे. पैकी पाइपलाइनव्दारे गॅस पुरवठा हा एक महत्त्वाकांक्षी प्रकल्प आहे. मुंबईत याच प्रकारे पाइपलाइनव्दारे स्वयंपाकाचा गॅस पुरवला जातो. सिडको वसाहती आणि पनवेल शहराला गॅस पुरवठा करण्यासाठी महानगर गॅस निगम लिमिटेडव्दारे पाइपलाइन टाकण्याचे काम जवळपास पूर्ण झाले आहे.
सुरुवातीला खारघर वसाहतीपर्यंत गॅसच्या वाहिन्या टाकण्यात आल्या होत्या. त्यानंतर शेडुंगपर्यंत विस्तारण्यात आल्या. मात्र खारघर आणि कळंबोली या दरम्यान असलेल्या कोपरा खाडी व आजूबाजूला कांदळवन असल्याने त्या पट्ट्यातील काम थांबले होते. मात्र या ठिकाणी पर्यावरण विभागाच्या मार्गदर्शक तत्त्वानुसार एलीटी मशिनच्याव्दारे ट्रेज लेस तंत्रज्ञानाचा वापर करण्यात आला आहे. याकरिता जिप्सम स्ट्रक्चर या कंपनीला नियुक्त केले होते.
तळोजा लिंक रोडच्या लगत पॉइंट तयार करून या ठिकाणाहून ड्रिलिंगव्दारे काम करण्यात आले आहे. गॅसवाहिनी जमिनीखाली टाकण्यात आल्याने फुटण्याचा अथवा गळतीचा धोका नाही. तांत्रिक बिघाड झाला तरी त्याचा परिणाम या पट्ट्यात होणार नाही तशी यंत्रणा या ठिकाणी बसविण्यात आली आहे. त्याचबरोबर कांदळवनाचा ऱ्हास न होता पाइपलाइन टाकण्यात आली आहे. खोली जास्त असल्याने झाडांच्या मुळाला कोणतीही इजा पोहचणार नसल्याचे पर्यावरण तज्ज्ञ तारिक बिलाल म्हणाले.