पाटणा - बिहारमधील समस्तीपूर येथे राजधानी एक्स्प्रेसमधून पडलेल्या महिला प्रवाशाचा उपचारांदरम्यान मृत्यू झाला आहे. ट्रेनमधून पडल्यानंतर ही तरुणी गंभीर जखमी झाली होती. तिला गंभीर अवस्थेत जीआरपीने रुग्णालयात दाखल केले होते. तिथे उपचारांदरम्यान तिचा मृत्यू झाला. (A young woman was standing at the gate of a moving train, suddenly lost her balance and Fell down)
०२५०३ दिब्रुगड येथून नवी दिल्ली येथे जाणाऱ्या राजधानी एक्स्प्रेसमधून ही तरुणी प्रवास करत होती. दरम्यान, ही ट्रेन जेव्हा रोसडा स्टेशनजवळ पोहोचली तेव्हा ही तरुणी ट्रेनच्या गेटजवळ गेली. याचदरम्यान, ट्रेनच्या वेगामुळे तरुणीचा तोल गेला आणि ती ट्रेनमधून खाली पडून गंभीर जखमी जखमी झाली होती.
तिला जीआरपी पोलिसांनी तातडीने रोसडा आरोग्य केंद्रात दाखल केले. तरुणीची गंभीर अवस्था पाहून डॉक्टरांनी तिला पुढील उपचारांसाठी मोठ्या रुग्णालयात घेऊन जाण्यास सांगितले. पोलिसांनी तिला तातडीने तिथे नेले असता डॉक्टरांनी तिला तपासून मृत घोषित केले. दरम्यान, मृताची ओळख पटू शकलेली नाही.
रोसडा जीआरपीचे एएसआय लालबाबू शुक्ला यांनी सांगितले की, स्थानिक लोकांनी रोसडा रेल्वे स्टेशन आणि गुमतीदरम्यान एक तरुणी राजधानी एक्स्प्रेसमधून पडली असल्याची माहिती दिली. त्यानंतर आम्ही तातडीने घटनास्थळी धाव घेऊन तरुणीला टेम्पोमध्ये टाकून रुग्णालयात दाखल केले. तर एएसआय लालबाबू शुक्ला यांनी सांगितले की, तरुणीची गंभीर अवस्था पाहून तिला मोठ्या रुग्णालयात नेण्यात आले. तिथे तिला मृत घोषित करण्यात आले.