Ahmedabad Plane Crash:अहमदाबादमध्ये गुरुवारी झालेल्या भीषण विमान अपघातात २४१ प्रवाशांसह २७० जणांचा भीषण मृत्यू झाला. अहमदाबादहून लंडनला जाणारे हे विमान उड्डाण केल्यानंतर काही क्षणात कोसळलं आणि मोठा स्फोटा झाला. या विमान अपघातात अनेक कुटुंबे उद्ध्वस्त झाली. यामध्ये वडोदरा येथील ५१ वर्षीय यास्मिन व्होरा यांचेही कुटुंब आहे. यास्मिन व्होरा यांनी ९ जून ऐवजी १२ जून रोजी लंडनला जाणाऱ्या फ्लाईटने जाण्याचा निर्णय घेतला होता. यास्मिन त्यांच्या गर्भवती सुनेला मदत करण्यासाठी निघाल्या होत्या. हे कुटुंब आपला आनंद द्विगुणीत करण्यासाठी निघालं होतं. मात्र यास्मिन यांनी आखलेली योजना पूर्ण झाली नाही आणि त्यांचा दुर्दैवी मृत्यू झाला.
गुरुवारी दुपारी यास्मिन या एअर इंडियाच्या फ्लाईट AI१७१ मधून लंडन गॅटविकला जात होत्या. अहमदाबादच्या सरदार वल्लभभाई पटेल आंतरराष्ट्रीय विमानतळावरून उड्डाण केल्यानंतर काही वेळातच, बोईंग ८७८ ड्रीमलायनर विमानतळाच्या बाहेर असलेल्या दाट लोकवस्ती असलेल्या मेघानी नगरमधील एका वसतिगृहात कोसळले. या अपघातात विमानातील २४१ प्रवाशांचा मृत्यू झाला तर केवळ एकच प्रवासी बचावला. यास्मिन यांच्यासोबत प्रवास करणारा त्यांचा पुतण्या परवेझ याचाही मृत्यू झाला.
यास्मिन यांचे पती यासिन व्होरा आता अहमदाबादमधील सिव्हिल हॉस्पिटलमधील पोस्टमार्टेम सेंटरच्या बाहेर कडक उन्हात वाट पाहत आहेत. पीडितांची ओळख पटवण्यासाठी डीएनए चाचणी सुरू आहे. आम्ही तिला विमानतळावर सोडल्यानंतर, अपघाताची माहिती मिळाली असं यासिन सांगतात. जेव्हा मला कळले की विमानात १.२५ लाख लिटर इंधन आहे, तेव्हा मला आतून खात्री पटली की मी तिला पुन्हा कधीही भेटणार नाही. तरीही मी तिला शोधत रुग्णालयात गेलो, पण मृतदेह आणि जखमींना घाईघाईने आत आणताना पाहिल्याचे यासिन म्हणाले.
"माझी दोन्ही मुले युकेमध्ये आहेत. लहान मुलाची पत्नी गर्भवती आहे. त्यासाठी यास्मिन तिची काळजी घेण्यासाठी जात होती. तिथे पाच ते सहा महिने थांबणार होती. शेवटी सगळ्यांची माफी मागून ती निघाली होती. मी माझ्या भाच्याचा तिला सोडायला एअरपोर्टवर गेलो होतो. ती खूप खुश होती. माझ्या सुनेला जे काही हवं होतं ते सर्व ती घेऊन जात होती. विमानातून तिने मला व्हिडिओ कॉल केला आणि मी जात आहे असं सांगितलं आणि तुमची काळजी घ्या असं म्हटलं," असं यासिन व्होरा म्हणाले.
"मुलांना या घटनेविषयी कळलं होतं मी मोठ्या हिमतीने त्यांना सांगितले की आता तुमची आई राहिलेली नाही ते काही बोलू शकले नाहीत त्यांनी रडायला सुरुवात केली माझ्या नाती त्यांच्या आजीची अजूनही वाट पाहत आहे त्यांना कल्पनाही नाही की मोठा अपघात झाला आहे," असंही व्होरा यांनी सांगितले.