Viral Amarjeet Jaikar : मागील काही दिवसांपासून बिहारच्या समस्तीपूर जिल्ह्यात राहणारा गायक अमरजीत जयकर सोशल मीडिया व्हायरल झाला आहे. ग्रामीण भागात राहणाऱ्या अमरजीतला गायनाची आवड असून, त्याचा एक व्हिडिओ मोठ्या प्रमाणात पाहिला जातोय. व्हिडिओ पाहून नेटकरी त्याच्या गाण्याचे तोंडभरुन कौतुकही करत आहेत. अमरजीतने त्याच्या यशाचे श्रेय गर्लफ्रेंडला दिले आहे. त्याच्या गर्लफ्रेंडने भेट म्हणून दिलेल्या गिटारमुळे त्याने गाण्याचा सराव सुरू केला आणि तो व्हायरल झाला.
आपल्या प्रेयसीबद्दल बोलताना 21 वर्षीय अमरजीत म्हणतो की, त्याची आणि तिची फेसबुकवर मैत्री झाली होती. ती आसाममध्ये राहते. नैराश्याच्या काळातही तिनेच अमरजीतची काळजी घेतली. तिनेच अमरजीतला व्हिडिओ बनवण्याची प्रेरणा दिली. अमरजीत फेमस नव्हता, तेव्हा तिने त्याला स्टँड, गिटार दिले. तिनेच त्याला व्हिडिओ सोशल मीडियावर अपलोड करण्यास सांगितले.
बीए प्रथम वर्षात शिकत असलेला अमरजीत स्टेज शो करतो. तसेच, त्याला भविष्यात गायक बनायचे आहे. त्याचा व्हिडिओ व्हायरल झाल्यानंतर अभिनेता सोनू सूदने त्याच्या गाण्याचे कौतुक केले आहे. विशेष म्हणजे, सोनूने अमरजीतला त्याच्या आगामी 'फतेह' या चित्रपटात गाण्याची ऑफरही दिली आहे. त्यासाठी, अमरजीत आता 27 फेब्रुवारी रोजी मुंबईत येतोय. याबाबत स्वतः अमरजीतने माहिती दिली.