केंद्रीय मंत्रिमंडळाचा धुव्वा

भारतीय निवडणुकांच्या इतिहासात पहिल्यांदाच सत्ताधारी ‘कॅबिनेट’वर इतका लाजिरवाणा पराभव स्वीकारण्याची नामुष्की ओढावली आहे.

नवी दिल्ली : भारतीय निवडणुकांच्या इतिहासात पहिल्यांदाच सत्ताधारी ‘कॅबिनेट’वर इतका लाजिरवाणा पराभव स्वीकारण्याची नामुष्की ओढावली आहे. संपुआच्या मावळत्या मंत्रिमंडळात ९० टक्के मंत्री असे आहेत ज्यांनी एक तर निवडणूक लढवलीच नाही आणि ज्यांनी लढवली त्यांना मतदारांनी सपशेल नाकारले. केंद्र सरकारमधे मानाची पदे भूषवलेल्या अनेक केंद्रीय मंत्र्यांना अक्षरश: जेमतेम स्थानिक ओळख असलेल्या उमेदवारांनी मात दिली आहे. एवढेच नव्हे तर लोकसभा सभापती असलेल्या मीरा कुमारांनाही या निवडणुकीत परावभवाचे तोंड पहाणे भाग पडले आहे. संपुआ दोनचे नेतृत्व करणारे पंतप्रधान मनमोहन सिंग, अर्थमंत्री पी. चिदंबरम, कृषी मंत्री शरद पवार, संरक्षण मंत्री ए. के. अ‍ॅँटोनी यांनी ही निवडणूक लढवलीच नाही. आणि ज्यांनी लढवली त्यात दस्तुरखुद्द कॉँग्रेसचे उपाध्यक्ष राहुल गांधी यांना शेवटपर्यंत अटीतटीच्या लढतीच्या अनिश्चततेचा सामना करावा लागला. कमलनाथ, जयपाल रेड्डी, मल्लिकार्जुन खारगे, ज्योतिरादित्य सिंदीया या चौघांनी फक्त आपापले मतदारसंघ राखत कॅबिनेटची उरलसुरली लाज राखली, असेच म्हणावे लागेल. विशेष म्हणजे संपुआ सरकारच्या काळात ज्या ज्या कॅबिनेट मंत्र्यांवर भ्रष्टाचाराचे आरोप झाले, त्यापैकी अनेकांना राजीनामे द्यावे लागले होते त्यांना आणि उरलेल्यांनाही मतदारांनी नाकारले. त्यात ए. राजा, श्रीप्रकाश जयस्वाल यांना पराभव पाहावा लागला. संपुआ सरकारचा गाडा हाकणारे, ज्यांचे मतदारसंघ म्हणजे हमखास विजयाची खात्री, असे वातावरण असताना मतदारांनी त्यांच्या प्रतिस्पर्ध्यांनाही चकीत करत विजयाची माळ फिरवली. अनेक मतदारसंघात तर अत्यंत नवख्या, केवळ राज्याच्या राजकारणात जेमतेम ओळख असणार्‍या उमेदवारांनी या मातब्बरांचा पाडाव केला. केंद्रात मनुष्यबळ मंत्री असलेल्या एम. एम. आर. पल्लम राजू यांच्यावर तर डिपॉझिट जप्त होण्याची पाळी आली. पूर्वमंत्री अजय माकन, पवन बन्सल यांचाही दारुण पराभव झाला. आता नव्या संसदेत गत मंत्रिमंडळातले हातावर मोजता येतील एवढेच चेहरे दिसतील अशी परिस्थिती निर्माण झाली आहे..