Udhampur Encounter: जम्मू आणि काश्मीरच्या उधमपूर जिल्ह्यात सुरक्षा दलांनी जैश-ए-मौहम्मदच्या चार दहशतवाद्यांना घेरलं होतं. भारतीय लष्कर आणि जम्मू आणि काश्मीर पोलिसांची संयुक्त टीम 'ऑपरेशन बिहाली' राबवत असतानाच एका दहशतवाद्याला कंठस्नान घालण्यात आलं आहे. तीन दहशतवाद्यांना घेरण्यात आलं असून त्यांच्याविरुद्ध कारवाई करण्यात येत आहे. खराब हवामानामुळे या कारवाईत अनेक अडचणी येत होत्या. मात्र सुरक्षा दलांनी वर्षभरापासून लक्ष ठेवलेल्या एका दहशतवाद्याला अखेर ठार केले.
उधमपूर चकमकीत भारतीय लष्कराला मोठे यश मिळाले आहे. लष्कराच्या जवानांनी एका दहशतवाद्याला ठार मारले आहे. उधमपूर जिल्ह्यातील बसंतगड येथे सकाळी ही चकमक सुरू झाली. ऑपरेशन बिहालीमध्ये एक दहशतवादी मारला गेला आहे. ही कारवाई अजूनही सुरू आहे,अशी माहिती लष्कराच्या व्हाईट नाईट कॉर्प्सने दिली. विशेष गुप्त माहितीच्या आधारे, लष्कर आणि जम्मू-काश्मीर पोलिसांनी बसंतगडच्या बिहाली भागात संयुक्त कारवाई सुरू केली. बराच वेळ चाललेल्या या चकमकीत एक दहशतवादी मारला गेला आहे.
गेल्या एक वर्षापासून या चार दहशतवाद्यांचा शोध सुरू होता. अचूक माहितीच्या आधारे गुरुवारी सकाळी बसंतगडच्या दुर्गम बिहाली भागात लष्कर आणि पोलिसांच्या संयुक्त शोध पथकाने शोध मोहीम सुरू केली. त्याच वेळी दहशतवाद्यांनी गोळीबार सुरू केला. त्यानंतर चकमक सुरू झाली. या भागात अतिरिक्त सैन्य पाठवण्यात आले आहे. दोन्ही बाजूंकडून थांबून थांबून गोळीबार सुरू आहे.
"सकाळी ८:३० च्या सुमारास दहशतवादी तिथे सापडले. आम्ही गेल्या एक वर्षापासून यांचा शोध घेत होतो धुके असूनही, शोध मोहीम सुरू आहे आणि हवामान सुधारल्यानंतरच खरी परिस्थिती कळेल," असे जम्मू रेंजचे पोलिस महानिरीक्षक भीम सेन तुती यांनी सांगितले. सुरक्षा दलांनी दहशतवादी पाकिस्तानस्थित जैश-ए-मोहम्मदचे सदस्य आहेत. लष्कराच्या पॅरा कमांडोंच्या नेतृत्वाखालील संयुक्त शोध पथकाला ते करूर नाल्याजवळ लपलेले आढळले. 'ऑपरेशन बिहाली' असे सांकेतिक नाव असलेले हे ऑपरेशन काश्मीरमध्ये वार्षिक अमरनाथ यात्रेआधी सुरु करण्यात आलं आहे.