कोंढाळी...

व�

��ठ्ठल नामाच्या गजराने दुमदुमली कोंढाळी नगरी
१० हजार भाविकांचा सहभाग : श्रीज्ञानेश्वर माऊलीची मिरवणूक
कोंढाळी : स्थानिक श्रीविठ्ठल-रुख्माई मंदिरात अखंड नामसंकीर्तन महोत्सवाचे आयोजन करण्यात आले. यानिमित्त गावात श्रीज्ञानेश्वर माऊली पालखी मिरवणूक काढण्यात आली. पालखीत विविध देखावे व विठ्ठल नामाच्या गजराने कोंढाळी नगरी दुमदुमली. या उत्सवात जवळपास १० हजार भाविकांचा सहभाग होता.
पालखी मिरवणुकीच्या स्वागतासाठी गावात ठिकठिकाणी रांगोळ्या काढण्यात आल्या. अनेक ठिकाणी स्वागतद्वार उभारण्यात आले होते. शोभायात्रेदरम्यान विविध संघटनांतर्फे मिठाई, चहा, फराळाचे वाटप करण्यात आले. येथील प्राचीन श्रीविठ्ठल-रुख्माई मंदिरात दरवर्षीप्रमाणे यंदाही अखंड नामसंकीर्तन महोत्सवाचे आयोजन करण्यात आले. या उत्सवात भागवत कथा सप्ताह व ज्ञानेश्वरी ग्रंथाचे सामूहिक पारायण करण्यात आले. यात परिसरातील हजारो भाविकांनी सहभाग घेतला.
कीर्तनकार नारायण शेंडे, पांडुरंग बारापात्रे, ज्ञानेश्वर नामदास, भीमराव कोठे, नामदेव टापरे, धनजंय मोरे आदी महाराजांनी हजेरी लावत कीर्तन सादर केले. याप्रसंगी पतंजली योग समिती व भारत स्वाभिमानी ट्रस्टतर्फे मोफत योग प्राणायाम शिबिराचे आयोजन करण्यात आले.
श्रीज्ञानेश्वर माऊलीच्या पालखीची भव्य मिरवणूक गुरुवारी दुपारी १ वाजता विठ्ठल-रुख्माई मंदिर येथून निघाली. कोंढाळी, दुधाळा, पांजरा, धूरखेडा वारकरी, खंजेरी भजन मंडळीसह जवळपास १० हजार महिला, पुरुष या मिरवणुकीत सहभागी झाले. मिरवणुकीत हनुमान, तुळजा भवानी, ज्ञानेश्वर आदींचे २५ स्वयंचलित देखावे, जबलपूर येथील मयूर नृत्य, सौंसर मध्य प्रदेश दिंडीसह ही मिरवणूक शनिचरा, ग्रामपंचायत, टाका देवस्थान, बाजार चौक, राऊतपुरा, रामनगर, चांदणी चौक, बसस्टॅण्डमार्गे श्रीसंत गुलाबबाबा आश्रम येथे पोहोचली. मिरवणुकीच्या मार्गात शनिचरा येथे मुस्लीम बांधवातर्फे दूध वितरण करण्यात आले. तसेच संपूर्ण मिरवणुकीदरम्यान घरांसमोर रांगोळ्या काढून पालखीचे स्वागत व पूजन करण्यात आले. पालखी मिरवणुकीस विविध सामाजिक व राजकीय संघटनांनी सहकार्य केले. (वार्ताहर)