नशेखोराच्या किलर कारचा थरार; दोन पोलिसांसह ६ जणांना चिरडले, ७ गाड्यांचा चक्काचूर

या भीषण अपघातात दोन पोलीस कर्मचाऱ्यांसह सहा जण गंभीर जखमी झाले असून ७ वाहनांचे प्रचंड नुकसान झाले आहे.

मध्य प्रदेशातील जबलपूरमध्ये काल रात्री एका मद्यधुंद रईसजाद्याने आपल्या आलिशान कारने अक्षरशः तांडव घातले. भरधाव वेगाने येणाऱ्या कारने वाटेत येतील त्या वाहनांना आणि नागरिकांना उडवत नेले. या भीषण अपघातात दोन पोलीस कर्मचाऱ्यांसह सहा जण गंभीर जखमी झाले असून ७ वाहनांचे प्रचंड नुकसान झाले आहे. या घटनेमुळे शहरात खळबळ माजली असून संतप्त नागरिकांनी आरोपीवर कठोर कारवाईची मागणी केली आहे.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

भरधाव कार बनली काळ

मिळालेल्या माहितीनुसार, ओमती पोलीस ठाण्याच्या हद्दीतील इन्कम टॅक्स चौकात ही घटना घडली. रात्री उशिरा आरोपी अनुराग सोनी हा आपल्या कारमधून सुसाट निघाला होता. नशेच्या धुंदीत असलेल्या या चालकाचा कारवरील ताबा सुटला आणि त्याने भंवरताल गार्डनपासूनच धुमाकूळ घालायला सुरुवात केली. रसल चौकात एका पोलिसाला धडक दिल्यानंतर त्याने गाडीचा वेग आणखी वाढवला.

एकामागून एक ७ वाहनांना उडवले

प्रत्यक्षदर्शींनी दिलेल्या माहितीनुसार, ही कार इतकी वेगात होती की समोर काय येतंय याच भान चालकाला नव्हतं. इन्कम टॅक्स चौकात उभ्या असलेल्या ३ कार आणि ४ दुचाकींना या कारने जोरदार धडक दिली. एका दुचाकीला तर कारने लांबपर्यंत फरफटत नेले आणि शेवटी सिंधिया पार्कच्या भिंतीला जाऊन धडकली. या धडकेत भिंतीचाही काही भाग कोसळला आहे.

पाणी पिण्यासाठी थांबले अन् काळ आला...

अपघातातील जखमी साहिल चौकसे याने सांगितले की, "आम्ही रस्त्याच्या कडेला पाणी पिण्यासाठी थांबलो होतो, तितक्यात मागून आलेल्या भरधाव कारने आम्हाला उडवले. धडक इतकी जोरात होती की मी जागीच बेशुद्ध झालो." या अपघातात एका लहान मुलाच्या पायालाही गंभीर दुखापत झाली असून त्याला तातडीने रुग्णालयात दाखल करण्यात आले आहे.

सीसीटीव्हीत थरार कैद

हा संपूर्ण थरार एका उभ्या असलेल्या कारच्या डॅशबोर्ड कॅमेऱ्यात कैद झाला आहे. यामध्ये आरोपीची कार कशाप्रकारे वेड्यावाकड्या वेगाने येऊन लोकांना चिरडत आहे, हे स्पष्ट दिसत आहे. घटनेनंतर घटनास्थळी बघ्यांची मोठी गर्दी झाली होती. पोलिसांनी तातडीने धाव घेत जखमींना उपचारासाठी पाठवले आणि रस्ता रिकामा केला.

आरोपी अटकेत, पोलीस तपासात व्यस्त

ओमती पोलीस ठाण्याचे प्रभारी राजपाल सिंह बघेल यांनी सांगितले की, आरोपी चालक अनुराग सोनी हा स्वतःही जखमी झाला असून तो मद्यधुंद अवस्थेत होता. त्याला ताब्यात घेऊन रुग्णालयात उपचार सुरू आहेत. पोलिसांनी त्याच्यावर गुन्हा दाखल केला असून सीसीटीव्ही फुटेजच्या आधारे पुढील कायदेशीर कारवाई केली जात आहे.