मध्य प्रदेशमधील धार जिल्ह्यामध्ये तीन मुलींचे मृतदेह विहिरीत सापडल्याने खळबळ उडाली आहे. या मुलींची हत्या कुणी अन्य व्यक्तीने नाही तर त्यांच्याच आईने केल्याची धक्कादायक बाब समोर आली आहे. पोलिसांनी या महिलेला अटक केली आहे. ही महिला तिच्या मुलींची हत्या केल्यानंतर त्यांचे मृतदेह विहिरीत टाकून फरार झाली होती. दरम्यान, या महिलेला कशाची तरी बाधा झाली होती. तिच्यावर तांत्रिकाकडून उपचारही सुरू होते, असा दावा तिच्या कुटुंबीयांनी केला आहे.
धार जिल्ह्यातील श्यामपुरा येथे तीन लहान मुलींचे मृतदेह विहीरीत सापडले होते. मिळालेल्या माहितीनुसार ही महिला खिलेडी गावातील रहिवासी होती. ती तीन मुलींसह श्यामपुरा गावात विवाहात सहभागी होण्यासाठी गेली होती. त्यानंतर ती मुलींना आंबे तोडायचे आहेत, असं सांगून निघून गेली. संध्याकाळपर्यंत न परतल्याने कुटुंबीयांनी शोधाशोध सुरू केली. तेव्हा विहिरीजवळ एका मुलीचा मृतदेह सापडला. त्यानंतर आजूबाजूला पाहिले असता आणखी दोन मुलींचे मृतदेह सापडले.
माहिती मिळताच पोलीस घटनास्थळी पोहोचले. त्यांनी मृतदेह जप्त करून पोस्टमार्टेमसाठी पाठवले. त्यानंतर विहिरीत महिलेचा शोघ घेण्यात आला. मात्र तिचा मृतदेह सापडला नाही. त्यानंतर पोलिसांनी तिची शोधाशोध सुरू केली. तपासादरम्यान, ती एका तलावाशेजारी असल्याचे समजले. त्यानंतर पोलिसांनी तिला अटक केली. चौकशीमध्ये तिने मुलींना विहिरीत ढकलून फरार झाल्याचे कबूल केले.
दरम्यान, हे संपूर्ण कुटुंब अंधविश्वासाची शिकार झालेले आहे. या महिलेला कुणाची तरी बाधा झाली होती. ती मानसिकदृष्ट्या त्रस्त होती. तिच्यावर तांत्रिकांकडून उपचार सुरू होते, असा दावा नातेवाईकांनी केला.