नमो भारत ट्रेनमधील 'तो' अश्लील चाळा पडणार महागात! तरुण-तरुणीवर FIR; किती शिक्षा होणार?

रेल्वेतील अश्लीलता आली अंगलट! नमो भारत ट्रेनमध्ये अश्लील कृत्य करणाऱ्या प्रेमी युगुलावर एफआयआर दाखल. व्हिडिओ व्हायरल करणाऱ्या कर्मचाऱ्याचीही हकालपट्टी.

दिल्ली-मेरठ दरम्यान धावणाऱ्या हायस्पीड 'नमो भारत' ट्रेनमध्ये एका प्रेमी युगुलाने केलेल्या अश्लील कृत्याने सध्या सोशल मीडियावर संतापाची लाट उसळली आहे. धावत्या ट्रेनमध्ये शारीरिक संबंध ठेवणाऱ्या या तरुण-तरुणीविरोधात आता प्रशासनाने कडक पावले उचलली आहेत. याप्रकरणी मुरादनगर पोलीस ठाण्यात एफआयआर दाखल करण्यात आला असून, आरोपी विद्यार्थ्यांचा शोध घेण्यासाठी पोलिसांनी चक्राकार तपास सुरू केला आहे.

नेमकं प्रकरण काय? 

गेल्या आठवड्यात सोशल मीडियावर एक व्हिडिओ तुफान व्हायरल झाला होता. या व्हिडिओमध्ये नमो भारत ट्रेनच्या सीटवर बसलेले एक तरुण आणि तरुणी सार्वजनिक शिष्टाचाराचे उल्लंघन करत शारीरिक संबंध ठेवताना दिसत होते. त्यांच्या कपड्यांवरून ते कॉलेजचे विद्यार्थी असल्याचे प्राथमिक अंदाजात दिसून आले. काही दाव्यांनुसार, मुलगा बीटेक आणि मुलगी बीसीएची विद्यार्थिनी असल्याचे म्हटले जात आहे, मात्र पोलिसांनी अद्याप याला अधिकृत दुजोरा दिलेला नाही.

व्हिडिओ व्हायरल करणाऱ्याचीही हकालपट्टी 

धक्कादायक बाब म्हणजे, ट्रेनमधील हा सीसीटीव्ही फीड रेकॉर्ड करून तो सोशल मीडियावर व्हायरल केल्याचा आरोप रिषभ कुमार नावाच्या कर्मचाऱ्यावर आहे. एनसीआरटीसीने या गंभीर प्रकरणाची दखल घेत रिषभ कुमारला तातडीने नोकरीवरून बडतर्फ केले आहे. आता त्याच्यावरही पोलिसांत गुन्हा दाखल करण्यात आला आहे.

'या' कलमांखाली गुन्हा दाखल 

मेंटनन्स एजन्सीच्या तक्रारीवरून पोलिसांनी भारतीय न्याय संहिता आणि आयटी कायद्याच्या विविध कलमांखाली गुन्हा नोंदवला आहे. यात सार्वजनिक ठिकाणी अश्लील कृत्य करणे (कलम २९६), दृश्यरती/व्हॉयेरिझम (कलम ७७) आणि माहिती तंत्रज्ञान कायद्याच्या कलम ६७ (अश्लील सामग्रीचे प्रसारण) यांचा समावेश आहे.

किती वर्षांची होणार शिक्षा? 

कायद्यानुसार, या आरोपींना कठोर शिक्षेला सामोरे जावे लागू शकते. यामध्ये, 

कलम २९६ (सार्वजनिक अश्लीलता): या अंतर्गत ३ महिन्यांची कैद किंवा १००० रुपये दंड किंवा दोन्ही होऊ शकते.

कलम ७७ : या कलमांतर्गत गुन्हा सिद्ध झाल्यास किमान १ ते ३ वर्षांपर्यंतची कैद आणि दंडाची तरतूद आहे.

आयटी ॲक्ट: इलेक्ट्रॉनिक माध्यमातून अश्लीलता पसरवल्याबद्दल मोठ्या दंडासह कोठडीची शिक्षा होऊ शकते.

सध्या पोलीस सीसीटीव्ही फुटेजच्या मदतीने या जोडप्याच्या प्रवासाचा मार्ग तपासत असून त्यांची ओळख पटवण्याचे काम युद्धपातळीवर सुरू आहे. सार्वजनिक वाहतूक व्यवस्थेचा अशा प्रकारे गैरवापर केल्याबद्दल सर्व स्तरांतून संताप व्यक्त होत आहे.