तेजस्वी यादव यांच्या ताफ्यातील एका वाहनाचा भीषण अपघात झाला आहे. पूर्णियातील मुफसिल पोलीस ठाण्याच्या बेलौरीजवळ हा अपघात झाला. या अपघातात वाहनाचा चालक मोहम्मद हलीम याचा जागीच मृत्यू झाला. तर 6 पोलीस जखमी झाले आहेत. याशिवाय दुसऱ्या कारमध्ये प्रवास करणारे चार नागरिकही जखमी झाल्याची माहिती मिळत आहे.
सर्व 10 जखमींना उपचारासाठी तातडीनने GMCH मध्ये दाखल करण्यात आले आहे. जखमींपैकी पाच जणांची प्रकृती गंभीर असल्याचे सांगण्यात येत आहे. माहिती मिळताच एसपी उपेंद्रनाथ वर्मा जीएमसीएचमध्ये पोहोचले आणि त्यांनी डॉक्टरांना सर्व जखमींवर योग्य उपचार करण्याच्या सूचना दिल्या. एसपी उपेंद्रनाथ वर्मा यांनी सांगितले की, एस्कॉर्ट वाहन आणि कारमध्ये टक्कर झाली. ज्यामध्ये एकाचा मृत्यू झाला आहे तर 6 पोलिसांसह अनेक नागरिक जखमी झाले आहेत.
जनविश्वास यात्रेदरम्यान तेजस्वी यादव यांचा ताफा पूर्णियातील बेलौरी येथून जात होता, असे सांगण्यात येत आहे. या वाहनाचाही या ताफ्यात समावेश होता. पूर्णिया कटिहार चार लेन रोडवर गाडी चुकीच्या बाजूला गेली. त्यामुळे कटिहारकडून येणाऱ्या लाल रंगाच्या कारची जोरदार धडक झाली. ज्यामध्ये ही मोठी दुर्घटना घडली आहे.
घटनेची माहिती मिळताच मृताच्या कुटुंबीयांनीही रुग्णालयात धाव घेतली. मृताची पत्नी आणि तिच्या कुटुंबीयांची अवस्था अत्यंत वाईट आहे. तेजस्वी यादव पूर्णिया, अररिया, किशनगंजच्या जनविश्वास यात्रेसाठी आले होते. रात्री साडेदहाच्या सुमारास ते पूर्णियाहून कटिहारकडे जात होते. तेव्हा हा अपघात झाला आहे.