बिहारमधील बेगुसराय येथे एक धक्कादायक घटना घडली आहे. येथे चार अल्पवयीन मुलांना दुकानातील कुरकुरे आणि बिस्किट चोरली म्हणून बेदम मारहाण करण्यात आली. मुलांना केवळ मारहाणच करण्यात आली नाही तर त्यांना तासनतास खांबाला बांधून ठेवण्यात आले. यादरम्यान, कुणीतरी या घटनेचा व्हिडीओ बनवून व्हायरल केला.
ही घटना २८ ऑक्टोबर रोजी वीरपूर पोलीस ठाण्याच्या हद्दीतील फाजिलपूर येथे घडली आहे. दरम्यान एसपींच्या आदेशावरून आरोपी दुकानदाराविरोधात गुन्हा दाखल करण्यात आला. मिळालेल्या माहितीनुसार शनिवारी सकाळी चार मुलांनी एका किराणा दुकानात शिरून बिस्किटे आणि कुरकुरे चोरले. यादरम्यान, चारही जणांना दुकानदाराने पकडले. त्यानंतर त्यांना मारहाण करण्यात आली. तसेच त्यांच्या डोळ्यंवर पट्टी बांधून ठेवण्यात आली.
धक्कादायक बाब म्हणजे तिथे उपस्थित असलेल्या लोकांना बघ्याची भूमिका घेत पाहत राहणे पसंत केले. कुणीही या मुलांना वाचवण्याचा प्रयत्न केला नाही. मात्र तिथे असलेल्या कुणीतरी या घटनेचा व्हिडीओ मोबाईलमध्ये काढला आणि हाच व्हिडीओ आता व्हायरल होत आहे. दरम्यान, या घटनेची माहिती मिळताच पोलिसांनी घटनास्थळी धाव घेतली. तसेच या मुलांची सुटका करून त्यांना पोलीस ठाण्यात नेले. किरकोळ चौकशी नंतर या मुलांना नातेवाईकांच्या ताब्यात देण्यात आले.
याबाबत एसपी योगेंद्र कुमार यांनी सांगितले की, दुकानदाराने चार मुलांना चोरी करताना पकडले. या प्रकरणी एसपी योगेंद्र कुमार यांनी सांगितले की, दुकानदारने मुलांना चोरी करताना रंगेहात पकडले. त्यानंतर या मुलांना मारहाणा करण्यात आली. तसेच खांबाला बांधण्यात आले, असे तपासामध्ये समोर आले आहे. पोलिसांनी मुलांच्या आईवडिलांशी संपर्क साधला. तसेच त्यांना लेखी तक्रार देण्यास सांगितले. मात्र अद्याप कुणीही तक्रार दिलेली नाही.