शरद पवार यांच्या संग्रहालयात रमले पंतप्रधान मोदी
By Admin | Updated: February 14, 2015 23:52 IST2015-02-14T23:52:24+5:302015-02-14T23:52:24+5:30
शरद पवार यांच्या संग्रहालयात रमले पंतप्रधान मोदी
>बारामतीतील विद्या प्रतिष्ठानमध्ये शरद पवार यांना आतापर्यंत मिळालेल्या वस्तू ठेवल्या आहेत. पंतप्रधान नरेंद्र मोदी या प्रदर्शनात चांगलेच रमले. जवळपास १० मिनीटे त्यांनी पाहणी केली. मोदी यांचे सकाळी ११.४५ वाजता बारामतीच्या विमानतळावर आगमन झाले. तेथून विद्या प्रतिष्ठानला भेट देऊन त्यांनी अभ्यासक्रमांची माहिती घेतली. वस्तूसंग्रहालयाला भेट दिल्यानंतर संस्थेच्या सीबीएसई स्कुलच्या इमारतीचे उद्घाटन केले. येथील विद्यार्थ्यांशी संवाद साधला. त्यानंंतर कृषी विकास प्रतिष्ठानच्या आवारातील आप्पासाहेब पवार सभागृहाचे उद्घाटन त्यांनी केले. संस्थेच्या कार्याची चित्रफित त्यांनी पाहिली. तेथून कृषी विज्ञान केंद्राला भेट दिली. कृषी विज्ञान केंद्रात सुरू असलेल्या शैक्षणिक, संशोधन उपक्रमाची माहिती घेतली. नेदरलॅँडच्या सहकार्याने विकसित टोमॅटोच्या निर्यातक्षम वाणाची त्यांनी विशेष माहिती घेतली. त्यानंतर शेतकरी मेळावा झाला. शरद पवार यांच्या गोविंद बाग या माळेगावातील निवासस्थानी स्नेह भोजन झाले. तेथून मेडद (ता. बारामती) गावच्या हद्दीत उभारण्यात आलेल्या हेलिपॅड वरुन ते पुण्याला रवाना झाले. मोदी यांच्यासोबत राज्यपाल सी. विद्यासागर राव, मुख्यमंत्री देवेंद्र फडणवीस, राष्ट्रवादी कॉँग्रेसचे अध्यक्ष शरद पवार, केंद्रीय कृषिमंत्री राधा मोहनसिंग, राज्याचे कृषिमंत्री एकनाथ खडसे, पालकमंत्री गिरीश बापट, नेदरलँडचे राजदूत स्टोईिलंग, माजी उपमुख्यमंत्री अजित पवार, खासदार सुप्रिया सुळे, प्रफुल्ल पटेल आदी या वेळी उपस्थित होते.
