कांगडा : हिमाचल प्रदेशातील कांगडा जिल्ह्यात असलेल्या नुरपूरमध्ये दरीत स्कूल बस कोसळून 29 विद्यार्थ्यांचा मृत्यू झाल्याची दुर्दैवी घटना घडली. ही घटना सोमवारी संध्याकाळी चार वाजताच्या सुमारास घडली.
मृत्यूमुखी पडलेल्या विद्यार्थ्यांच्या नातेवाईकांना प्रत्येकी पाच लाख रुपयांची मदत करण्यात येणार असल्याचे हिमाचल प्रदेशचे मुख्यमंत्री जयराम ठाकूर यांनी सांगितले.
हिमाचल प्रदेशचे मुख्यमंत्री जयराम ठाकूर यांनी या दुर्दैवी घटनेबाबत शोक व्यक्त करत न्यायालयीन चौकशीचे आदेश दिले आहेत. यावेळी जयराम ठाकूर म्हणाले की, या अपघाताची बातमी समजली, त्यावेळी मला नऊ मुलांचा मृत्यू आणि अनेक जण जखमी झाल्याचे सांगण्यात आले. घटनास्थळी एनडीआरएफची टीम तात्काळ दाखल झाली असून बचावकार्य सुरु आहे. स्थानिक लोकांकडून सुद्धा मदत करण्यात येत आहे. तसेच, या घटनेची चौकशीचे आदेश दिले आहेत.