हरियाणा - प्रसिद्ध डान्सर आणि बिग बॉस फेम सपना चौधरीकडून सध्या दिल्ली विधानसभा निवडणुकांसाठी भाजपाचा प्रचार करण्यात येत आहे. आम आदमी पार्टीविरोधात भाजपाने अनेक दिग्गज नेते आणि सेलिब्रिटी प्रचाराच्या मैदानात उतरवले आहेत. भाजपाच्या स्टार प्रचारक सपना चौधरी यांनी एका सभेतील उपस्थितांना आवाहनात्मक प्रश्न विचारला. त्यावेळी, समोरील कार्यकर्त्यांच्या उत्तरामुळे भाजपा नेत्यांसह सपना चौधरींचीही गोची झाली.
ढोंडी विधानसभा मतदारसंघातील भाजपा उमेदवाराच्या प्रचारार्थ सपना चौधरींच्या लहानशा सभेचं आयोजन करण्यात आलं होतं. या सभेतील भाषणाचा सपना यांचा व्हिडीओ व्हायरल होत आहे. या व्हिडीओत सपना चौधरी समोरील उपस्थितांना प्रश्न विचारतात. तुम्ही कोणाला मुख्यमंत्री बनवणार, कोणाला मत देणार? असा प्रश्न सपना चौधरीने विचारला. त्यावेळी, समोरील जनतेनं चक्क केजरीवाल यांचं नाव घेतलं. विशेष, म्हणजे दुसऱ्यांदाही मोठ्या आवाजात केजरीवाल म्हणत भाजपा नेत्यांची अन् सपना चौधरींची गोची करण्याचं काम जनतेनं केलं.
सध्या दिल्ली विधानसभा निवडणुकांचा प्रचार अंतिम टप्प्यात आला असून आरोप प्रत्यारोपाच्या चांगल्याच फैरी झडत आहेत. दिल्लीचे मुख्यमंत्री आणि आम आदमी पक्षाचे प्रमुख अरविंद केजरीवाल यांनी केंद्रीय गृहमंत्री अमित शाह यांच्यावर कडाडून टीका केली आहे. आपण अमित शाह यांना दिल्लीच्या प्रत्येक मुद्द्यावर चर्चा करण्यासाठी आमंत्रित केले होते. परंतु, शाह यांच्याकडून काहीही प्रतिसाद आला नसल्याचे केजरीवाल यांनी म्हटले आहे.
सपना चौधरी यांनी 7 जुलै 2019 रोजी दिल्लीत भाजपा नेत्यांच्या उपस्थितीमध्ये झालेल्या एका कार्यक्रमात भाजपामध्ये प्रवेश केला. दिल्लीमधील जवाहरलाल नेहरू स्टेडिअममध्ये भारतीय जनता पक्षाचे सदस्यता अभियान सुरू होते. या अभियानामध्ये सहभाग घेत सपनाने आज भाजपाचे सदस्यत्व स्वीकारले आहे. सपना चौधरी ही तेरी आंख्या को यो काजोल... मन करे से गोरी घायल.... या गाण्यामुळे देशभर पोहोचली असून तिचे खूप फॅन फॉलोवर्स आहेत.