संजद- भाजपात वाक्युद्ध भडकले

पूर्वाश्रमीचा रालोआचा घटक पक्ष असलेला संजद आणि भाजपामध्ये राज्यसभा पोटनिवडणुकीवरून वाक्युद्ध पेटले आहे.

पाटणा : पूर्वाश्रमीचा रालोआचा घटक पक्ष असलेला संजद आणि भाजपामध्ये राज्यसभा पोटनिवडणुकीवरून वाक्युद्ध पेटले आहे. नितीशकुमार यांनी राजदचे समर्थन मागितल्याबद्दल भाजपाने टीकास्त्र सोडले असतानाच संजदने दोन अपक्ष उमेदवारांना भाजपा पडद्याआडून पाठिंबा देत असल्याचा आरोप केला आहे.
पुढील आठवड्यात होणाऱ्या राज्यसभेच्या पोटनिवडणुकीत राजदचे समर्थन घेत नितीशकुमार यांनी नैतिक मूल्य आणि तत्त्व आणि स्वाभिमानाशी तडजोड केली आहे. लालूप्रसाद यांची १५ वर्षांची मुख्यमंत्रिपदाची कारकीर्द जंगलराज असल्याची टीका नितीश कुमार यांनी केली होती, याचे स्मरणही भाजपाचे नेते सुशील कुमार मोदी यांनी टिष्ट्वटरवर करवून दिले.दोन अपक्ष उमेदवारांना पडद्याआडून समर्थन देणाऱ्या भाजपाला नैतिक आधार राहिला काय, या शब्दांत नितीश कुमार यांनी प्रत्युत्तर दिले.
संजदला पाठिंब्याबाबत
सल्लामसलत करणार
१९ जून रोजी होणाऱ्या राज्यसभेच्या दोन जागांसाठी होणाऱ्या पोटनिवडणुकीत संजदच्या उमेदवारांना समर्थन नेण्याबाबत लालूप्रसाद यादव राजदच्या आमदारांशी सल्लामसलत करणार आहेत. नितीशकुमार यांनी लालूप्रसाद यादव यांच्याशी दूरध्वनीवरून संपर्क साधताना संजदच्या उमेदवाराला पाठिंबा मागितला होता. त्यानंतर पक्ष आमदारांशी सल्लामसलत करूनच निर्णय घेतला जाणार असल्याचे स्पष्ट केले. (वृत्तसंस्था)