‘ग्रीनपीस’च्या कर्मचाऱ्याला परतवले

ग्रीनपीस संस्थेच्या आंतरराष्ट्रीय कर्मचाऱ्याला वैध दस्तऐवज असतानाही भारतात प्रवेश नाकारण्यात आल्याचा प्रकार घडल्याने नवा वाद उफाळला आहे.

नवी दिल्ली : ग्रीनपीस इंडिया या पर्यावरण स्वयंसेवी संस्थेच्या एका प्रचारकाला विमानातून उतरविण्यात आल्याचा प्रकार काही महिन्यांपूर्वी घडला असताना याच संस्थेच्या आंतरराष्ट्रीय कर्मचाऱ्याला वैध दस्तऐवज असतानाही भारतात प्रवेश नाकारण्यात आल्याचा प्रकार घडल्याने नवा वाद उफाळला आहे.
ग्रीनपीस इंटरनॅशनलचे सदस्य अ‍ॅरोन ग्रे ब्लॉक संघटनेच्या भारतातील कर्मचाऱ्यांसोबत बैठकींची मालिका पार पाडण्यासाठी शनिवारी सिडनीहून भारतात आले असता त्यांना भारतात प्रवेश नाकारण्यात आला.आॅस्ट्रेलियन पासपोर्टवर ते भारतात आले होते. बंगळुरू येथील स्थलांतरण अधिकाऱ्यांनी ग्रे ब्लॉक यांना प्रवेश नाकारण्याचे औपचारिक कारण दिलेले नाही. ब्लॉक यांना अधिकृतरीत्या देशाबाहेर घालविण्यात आले नाही, असा दावा ग्रीनपीस इंडियाने केला आहे. आमच्या सहकाऱ्याकडे वैध व्यावसायिक व्हिसा असतानाही भारतात प्रवेश नाकारण्यात आला असून त्यामागचे कारण स्पष्ट करण्यात आलेले नाही. ग्रीनपीसच्या कर्मचाऱ्यांना अशा प्रकारची जाचक वागणूक का दिली जात आहे, याचे कोणतेही ठोस कारण दिसत नाही. याबाबत गृहमंत्रालय स्पष्टीकरण देईल अशी अपेक्षा असल्याचे ग्रीनपीसच्या दिव्या रघुनंदन यांनी म्हटले.
पासपोर्ट घेतला ताब्यात
ग्रे ब्लॉक यांना भारतात प्रवेश नाकारतानाच पासपोर्ट जप्त करण्यात येऊन क्वालालंपूरच्या विमानात बसविण्यात आले. त्या ठिकाणी विमान उतरल्यानंतरच त्यांना पासपोर्ट देण्यात आला. ते पुन्हा आॅस्ट्रेलियात परतल्याचा दावा ग्रीनपीसने केला आहे. (लोकमत न्यूज नेटवर्क)