Rajyasabha Elections: बिहारमध्ये एनडीएनं सर्व जागा जिंकल्या; ओडिसा- हरियाणामध्ये काय परिस्थिती? 

Rajyasabha Elections News: देशातील तीन महत्त्वाच्या राज्यांमध्ये झालेल्या राज्यसभा निवडणुकीच्या निकालांनी राजकीय वर्तुळात मोठी खळबळ उडवून दिली.

देशातील तीन महत्त्वाच्या राज्यांमध्ये झालेल्या राज्यसभा निवडणुकीच्या निकालांनी राजकीय वर्तुळात मोठी खळबळ उडवून दिली. बिहारमध्ये सत्ताधारी एनडीएने सर्व पाच जागा जिंकून आपले वर्चस्व सिद्ध केले आहे. तर, ओडिशामध्ये क्रॉस व्होटिंगमुळे बीजेडीला मोठा धक्का बसला आहे. दुसरीकडे, हरियाणामध्ये मतांच्या वादावरून निकालाची घोषणा लांबणीवर पडली आहे. २०२६ ची ही राज्यसभा निवडणूक केवळ आकडेवारीची लढाई राहिली नसून ती राजकीय रणनीती आणि चाणक्यनीतीची मोठी परीक्षा ठरली आहे.

बिहारमध्ये एनडीएचा एकहाती विजय

बिहारमध्ये राज्यसभेच्या ५ जागांसाठी झालेल्या निवडणुकीत एनडीएने ५-० असा दणदणीत विजय मिळवला आहे. विरोधकांच्या इंडिया आघाडीसाठी हा मोठा पराभव मानला जात आहे. एनडीएकडून नितीश कुमार, नितीन नवीन, रामनाथ ठाकूर, उपेंद्र कुशवाह आणि शिवेश राम हे विजयी झाले आहेत. महाआघाडीचे ४ आमदार मतदानाला गैरहजर राहिल्याने विरोधी उमेदवार अमरेंद्र सिंह धारी यांचा पराभव झाला. या विजयामुळे बिहारमध्ये मुख्यमंत्री नितीश कुमार आणि भाजपची पकड पुन्हा एकदा मजबूत असल्याचे स्पष्ट झाले आहे.

ओडिशामध्ये क्रॉस-व्होटिंग'मुळे चित्र बदलले

ओडिशात मुख्यमंत्री नवीन पटनायक यांच्या बीजेडी पक्षाला अंतर्गत बंडाळीचा मोठा सामना करावा लागला. ४ जागांसाठी झालेल्या या निवडणुकीत बीजेडीचे ८ आणि काँग्रेसच्या ३ आमदारांनी क्रॉस व्होटिंग करत भाजप पुरस्कृत अपक्ष उमेदवार दिलीप रे यांना मतदान केले. क्रॉस-व्होटिंग'मध्ये सहभागी असलेल्या बीजेडी आमदारांमध्ये सौभिक बिस्वाल, देबीरंजन त्रिपाठी, सुभासिनी जेना, नबा मल्लिक, चक्रमाणी कन्हार आणि रामकांत भोई यांसारख्या नावांचा समावेश आहे. याव्यतिरिक्त, यापूर्वीच पक्षातून निलंबित करण्यात आलेले दोन आमदार सनतन महाकुड आणि अरविंद महापात्र यांनीही पक्षाच्या अधिकृत भूमिकेच्या विरोधात मतदान केले. घडलेल्या या घडामोडींकडे BJD प्रमुख नवीन पटनायक यांच्यासाठी एक मोठा राजकीय धक्का म्हणून पाहिले जात आहे.

हरियाणात मतदानावरून हायव्होल्टेज ड्रामा, निकाल रखडला

हरियाणामध्ये ९० पैकी ८८ आमदारांनी मतदान केले. परंतु, ३ विशिष्ट मतांवरून मोठा वाद निर्माण झाला आहे. काँग्रेसचे परमवीर सिंग, भारत बेनिवाल आणि भाजपचे अनिल विज यांच्या मतांवर आक्षेप घेण्यात आला आहे. हा वाद आता केंद्रीय निवडणूक आयोगात पोहोचला आहे. आयोगाचा निर्णय येईपर्यंत हरियाणातील राज्यसभा निकालांची अधिकृत घोषणा प्रलंबित ठेवण्यात आली आहे.