राफेलचा गुंता सुटेल

फ्रान्सच्या संरक्षण क्षेत्रातील नामवंत डेसॉल्ट कंपनीने भारतासोबत १० अब्ज डॉलरच्या बहुप्रतीक्षित राफेल विमानांच्या सौद्याचा गुंता लवकरच सुटण्याची आशा व्यक्त केली आहे.

बंगळुरू : फ्रान्सच्या संरक्षण क्षेत्रातील नामवंत डेसॉल्ट कंपनीने भारतासोबत १० अब्ज डॉलरच्या बहुप्रतीक्षित राफेल विमानांच्या सौद्याचा गुंता लवकरच सुटण्याची आशा व्यक्त केली आहे. या लढाऊ विमानांच्या किमतीत कोणताही बदल केला नसून, विनंती प्रस्तावातील अटींवर आम्ही कायम असल्याचे या कंपनीचे मुख्य कार्यकारी अधिकारी एरिक ट्रेपियर यांनी गुरुवारी सांगितले. येथील एअरो शो-२०१५ मध्ये ते बोलत होते.
दरम्यान, भारतात सुखोई-३० एमकेआय लढाऊ विमान कोसळण्याची घटना मानवी चुकीमुळे घडल्याचा दावा रशियाच्या इरकुट कॉर्पोरेशनचे उपाध्यक्ष व्हिटाली बोरोडिक यांनी केला असून भारतीय वायुदलाने त्याचा इन्कार केला आहे. गेल्या वर्षी आॅक्टोबरमध्ये सुखोई कोसळल्यानंतर भारताने या विमानांच्या संपूर्ण ताफ्याचा वापर एक महिन्यासाठी थांबविला होता. (वृत्तसंस्था)


मेक इन इंडियाला रशियाचे समर्थन
पंतप्रधान नरेंद्र मोदी यांनी मेक इन इंडियाचा नारा दिल्याबद्दल रोस्टेक या रशियन सरकारी कंपनीने जोरदार समर्थन केले आहे. नागरी आणि संरक्षण क्षेत्रात विकास, उत्पादन आणि उच्च तंत्रज्ञानयुक्त औद्योगिक उत्पादनांच्या निर्यातीला प्रोत्साहन देण्याचे काम ही कंपनी करते. भारताने अमेरिकेकडून उत्पादने खरेदी केल्यामुळे आमचे भारतासोबतचे संबंध बिघडणार नाहीत. आम्ही कोणत्याही देशाला अन्य देशांची उत्पादने खरेदी करण्याला अटकाव घालत नाही. अमेरिकेचे मात्र तसे नाही, असे या कंपनीच्या एका वरिष्ठ अधिकाऱ्याने स्पष्ट केले.
—————————————-
सुखोई आता ब्रह्मोसने सुसज्ज
ध्वनीच्या वेगापेक्षा जास्त गती असलेले ब्रह्मोस क्षेपणास्त्र जोडलेले एकात्म सुखोई- ३० लढाऊ विमान एचएएल या भारतीय कंपनीने गुरुवारी वायुदलाच्या सुपूर्द केले. ब्रह्मोस क्षेपणास्त्र जोडल्यामुळे हे विमान अतिशय घातक शस्त्रांनी सुसज्ज झाले असल्याचे एचएएलचे अध्यक्ष टी सुवर्णा राजू यांनी स्पष्ट केले. या कंपनीच्या अंतर्गत डिझाईन चमूने ब्रह्मोसच्या एकत्रीकरणाचे काम चोखपणे पार पाडले. येथे हवाईदलाच्या येलहंका तळावर एअरो शोच्या वेळी ते वायुदलाच्या सुपूर्द करण्यात आले.