पंजाबमधील गँगस्टर जग्गू भगवानपुरियाची आई हरजीत कौर यांची अज्ञातांनी गोळ्या झाडून हत्या केली. या घटनेत हरजीत कौर यांच्या चालकाही मृत्यू झाला. गुरुवारी रात्री उशिरा बटाला येथे हा धक्कादायक प्रकार घडला. याप्रकरणी स्थानिक पोलीस ठाण्यात अज्ञात व्यक्तीविरोधात गुन्हा दाखल करण्यात आला असून पोलीस त्यांचा शोध घेत आहेत. हा संपूर्ण प्रकार घटनास्थळावरील सीसीटीव्ही कॅमेऱ्यात कैद झाला.
सीसीटीव्ही फुटेजमध्ये दिसत आहे की, गुरुवारी रात्री १०.४५ वाजताच्या सुमारास कादियन रोडवरील एका बेकरीबाहेर एक पांढऱ्या रंगाची स्कॉर्पिओ एसयूव्ही थांबते. तितक्यात पाठीमागून मोटारसायकलवरून आलेल्या दोन हल्लेखोर स्कॉर्पिओमध्ये पुढच्या सीटवर बसलेल्या लोकांवर गोळीबार करतात आणि घटनास्थळावरून पळून जातात.
या घटनेत गंभीर जखमी झालेल्या हरजीत कौर यांना तातडीने अमृतसर येथील रुग्णालयात दाखल करण्यात आले. परंतु, उपचारादरम्यान त्यांचा मृत्यू झाला. या गोळीबाराच्या घटनेत हरजीत कौर यांचा चालक करणवीर सिंग याचाही मृत्यू झाला. पोलिसांनी दिलेल्या माहितीनुसार, आम्हाला रात्री १०:४५ च्या सुमारास गोळीबार झाल्याचा फोन आला आणि आम्ही घटनास्थळी धाव घेतली. याप्रकरणी दोन अज्ञात व्यक्तींविरोधात गुन्हा दाखल करण्यात आला. हत्येचे कारण अद्याप अस्पष्ट असून पोलीस हल्लेखोरांचा शोध घेत आहेत.
हरजीत कौर स्थानिक राजकारणात सक्रिय म्हणून ओळखल्या जात होत्या. त्यांनी २०२२ मध्ये त्यांचा मुलगा भगवानपुरियाला तुरुंगात बुलेटप्रूफ जॅकेट देण्याची मागणी केली होती, त्यामुळे त्या चर्चेत आल्या होत्या. जग्गू भगवानपुरिया हा पंजाबमधील कुख्यात गुन्हेगार असून सध्या तो आसामच्या सिलचर तुरुंगात आहे. त्याच्यावर हत्या, ड्रग्ज तस्करी आणि खंडणी यांसारखे अनेक गुन्हे दाखल आहेत. या वर्षाच्या सुरुवातीला नार्कोटिक्स कंट्रोल ब्युरोने त्याला भटिंडा मध्यवर्ती तुरुंगातून अटक केली. त्यानंतर सुरक्षेच्या कारणास्तव त्याला आसामला हलवण्यात आले.