Gujarat Maternity Hospital: हॉटेल्स आणि मॉल्समध्ये छुप्या कॅमेऱ्यांनी चेंजिंग रूम्सचे व्हिडीओ काढण्याच्या अनेक घटना समोर आल्या आहेत. मात्र आता गुजरातमधील एका रुग्णालयाचे खासगी व्हिडिओ सोशल मीडियावर अपलोड करण्यात आले आहेत. या सगळ्या प्रकारामुळे गुजरातमध्ये खळबळ उडाली आहे. धक्कादायक बाब म्हणजे हे व्हिडीओ टेलिग्रामर विकण्यात आले आहेत. या घटनेनंतर रुग्णालयात उपचारासाठी गेलेल्या महिलांमध्ये भीतीचे वातावरण निर्माण झालं आहे.
गुजरातमधील राजकोटमध्ये एका मॅटर्निटी रुग्णालयाचे व्हिडिओ लीक झाले आहेत. महिला रुग्णांच्या वैद्यकीय चाचण्यांदरम्यान रेकॉर्ड केलेले अनेक खासगी व्हिडिओ एका यूट्यूब चॅनलवर अपलोड करण्यात आले आहेत. तसेच हे व्हिडीओ टेलिग्राम चॅनेलवर विकण्यासाठी जाहिरात केली गेली. या प्रकरणी रुग्णालयाविरुद्ध गुन्हा दाखल करण्यात आला आहे.
मेघा एमबीबीएस या यूट्यूब चॅनेलवर पायल मॅटर्निटी हॉस्पिटलचे सात व्हिडिओ अपलोड करण्यात आले आहेत. त्यानंतर हे व्हिडीओ टेलिग्राम ग्रुपद्वारे ९९९ ते १५०० पर्यंत विकले जात होते. या खुलाशानंतर संपूर्ण परिसरात संतापाची लाट उसळली असून पोलिसांनी रुग्णालयाविरुद्ध गुन्हा दाखल केला आहे. पोलिसांनी सांगितले हे टेलिग्राम अकाऊंट चालवणाऱ्यांनी लोकांना आकर्षित करण्यासाठी आपल्या थंबनेल इमेजमध्ये महाकुंभमध्ये स्नान करताना महिलांचे फोटो देखील वापरले होते.
गुजरात पोलिसांनी दिलेल्या माहितीनुसार, व्हायरल व्हिडिओ सीसीटीव्ही फुटेजचा भाग आहेत, ज्यामध्ये महिला रुग्णांची डॉक्टरांकडून तपासणी करताना किंवा नर्सकडून इंजेक्शन घेताना दिसत आहे. तसेच हा टेलिग्राम ग्रुप सप्टेंबर २०२३ मध्ये तयार करण्यात आला होता. तर यूट्यूब चॅनल जानेवारी २०२४ मध्ये सुरू झाले होते. टेलिग्राम ग्रुपमध्ये ९० पेक्षा जास्त सदस्य होते, जे व्हिडिओ खरेदी करण्यासाठी पैसे देत होते.
"आरोपींनी यूट्यूबवर सात व्हिडिओ अपलोड केले होते आणि डिस्क्रिप्शनमध्ये टेलिग्राम ग्रुपची लिंक दिली होती. ग्रुपमध्ये सामील होणाऱ्या लोकांकडून या व्हिडीओंसाठी पैशांची मागणी करण्यात आली होती. अधिक लोकांना आकर्षित करण्यासाठी व्हिडिओचे स्क्रीनशॉट देखील शेअर करण्यात आले होते," अशी माहिती राजकोट सायबर क्राईम विभागाचे पोलीस अधीक्षक हार्दिक माकाडिया यांनी सांगितले.
दुसरीकडे, पायल मॅटर्निटी हॉस्पिटलने दावा केला की त्यांची सीसीटीव्ही यंत्रणा हॅक झाली असावी. "कोणीतरी आमच्या सीसीटीव्ही यंत्रणेचा ॲक्सेस घेतला आहे. आम्ही कोणतीही चूक केलेली नाही आणि पोलीस तपासात पूर्ण सहकार्य करू, असं हॉस्पिटलकडून सांगण्यात आलं आहे. मात्र अशा संवेदनशील खोलीत रुग्णालयाने सीसीटीव्ही कॅमेरे का बसवले गेले असा सवाल आता उपस्थित केला जात आहे.