प्रीती झिंटा आणि नेस वाडियांमध्ये तडजोड होणार ?

प्रीती आणि नेस वाडिया यांच्यात तडजोड होणार असून लवकरच प्रीती तक्रार मागे घेईल अशी शक्यता दोघांच्या निकटवर्तींयांकडून वर्तवण्यात येत आहे.

ऑनलाइन टीम

मुंबई, दि. १७ - अभिनेत्री प्रीती झिंटा आणि उद्योगपती नेस वाडिया यांच्यात निर्माण झालेला वाद आता शमण्याची चिन्हे आहेत. प्रीती आणि नेस वाडिया यांच्यात तडजोड होणार असून लवकरच प्रीती तक्रार मागे घेईल अशी शक्यता दोघांच्या निकटवर्तींयांकडून वर्तवण्यात येत आहे.

एका इंग्रजी वृत्तपत्राने दिलेल्या वृत्तानुसार प्रीती झिंटा आणि आणि नेस वाडिया यांच्यात तडजोडीसंदर्भात चर्चा सुरु आहे. प्रीतीने आयपीएलमधील संघ किंग्ज इलेव्हन पंजाबमधील मालकी हक्क सोडण्याची तयारीही दर्शवली असून तडजोड झाल्यानंतर प्रीती कायमची अमेरिकेत स्थलांतर करेल असे या वृत्तात म्हटले आहे. प्रीती आणि नेस वाडिया या दोघांच्या निकटवर्तीय वकिल मित्राच्या मार्फत तडजोडीवर चर्चा सुरु असून प्रीती व वाडिया या दोघांची मित्रमंडळीही तडजोडीसाठी प्रयत्न करत आहे. 

प्रीती व नेस वाडिया यांचे किंग्स इलेव्हन पंजाब या संघात प्रत्येकी २६ टक्के शेअर्स आहेत. प्रीती या संघातील मालकी सोडण्याची तयारी दर्शवली आहे. 

आयपीएल हंगामात मुंबईतील वानखेडे स्टेडियममधील सामन्या दरम्यान नेस वाडियांनी शिवीगाळ तसेच विनयभंग केल्याची तक्रार अभिनेत्री प्रीती झिंटाने केली होती. यानुसार पोलिसांनी नेस वाडियांविरोधात भारतीय दंड विधानातील कलम ३५४, ५०९ अंतर्गत गुन्हा दाखल केला आहे. यागुन्ह्यात नेस वाडिया दोषी ठरल्यास त्यांना पाच वर्षाचा तुरुंगवास होऊ शकतो.