Vijay Rupani PM Modi Plane Crash: माजी मुख्यमंत्री विजय रुपाणी यांच्या कुटुंबीयांची पंतप्रधान मोदी यांनी भेट घेतली. कुटुंबीयांशी बोलताना ते भावूक झाले. 'विजयभाई आपल्यात नाहीत, हे मान्य करायला माझं मन अजूनही तयार नाहीये', अशा शब्दात पंतप्रधान नरेंद्र मोदी यांनी भावना व्यक्त केल्या. पंतप्रधान मोदींनी रुपाणींसोबत आठवणी आणि कार्यालाही उजाळा दिला.
'लोकमत'चं WhatsApp चॅनल फॉलो करा!
एअर इंडियाच्या विमानाच्या अपघातानंतर पंतप्रधान नरेंद्र मोदी शुक्रवारी (१३ जून) अहमदाबादमध्ये पोहोचले. मोदींनी अपघात झालेल्या ठिकाणाला भेट दिली. अपघाताची माहिती घेतल्यानंतर ते जखमींनाही भेटले.
मोदींनी घेतली विजय रुपाणींच्या कुटुंबीयांची भेट
पंतप्रधान नरेंद्र मोदी यांनी विमान अपघातात मृत्यू झालेल्या माजी मुख्यमंत्री विजय रुपाणी यांच्या कुटुंबीयांची भेट घेतली. मोदींनी कुटुंबीयांचे सात्वंन केले. यावेळी त्यांनी विजय रुपाणी यांच्या कार्यकर्ता ते मुख्यमंत्री होण्यापर्यंतच्या आठवणींनाही उजाळा दिला.
मोदी म्हणाले, "मी विजयभाई रूपाणी यांच्या कुटुंबाची भेट घेतली आणि सहवेदना व्यक्त केल्या. माझे मन अजूनही हे स्वीकारायला तयार नाहीये की, विजयभाई आता आपल्यात नाहीत."
सामान्य कार्यकर्ता ते मुख्यमंत्री
"मी अनेक वर्षांपासून त्यांच्यासोबत काम करत आलो आहे. आम्ही अनेक आव्हानात्मक काळात खांद्याला ते खांदा लावून काम केले. साध्या आणि मृदू स्वभावाचे विजयभाई हे खूप मेहनती आणि पक्षाच्या तत्वज्ञानासाठी समर्पित होते. सामान्य कार्यकर्ता म्हणून त्यांनी सार्वजनिक जीवनात कामाला सुरुवात केली. संघटनेत विविध जबाबदाऱ्या पार पाडत ते गुजरातच्या मुख्यमंत्री बनले होते", अशी आठवण सांगतांना मोदी भावूक झाले.
पंतप्रधान नरेंद्र मोदी सकाळी दहा वाजता अहमदाबादमध्ये पोहोचले. त्यांनी आधी घटनास्थळाला भेट दिली. नंतर ते अहमदाबाद सिव्हिल रुग्णालयात गेले आणि जखमींची विचारपूस केली. विमानातून प्रवास करणारा आणि अपघातातून वाचलेल्या रमेश विश्वास कुमार याचीही मोदींनी भेट घेतली.