नवी दिल्ली - दिल्लीहून भोपाळला जाणाऱ्या वंदे भारत ट्रेनच्या एका प्रवाशाला झांशी रेल्वे स्टेशनवर टोळक्यांनी मारहाण केली. या मारहाणीत प्रवासी गंभीर जखमी झाला. भाजपा आमदार राजीव सिंह यांच्या इशाऱ्यावर समर्थकांनी ही मारहाण केल्याचा आरोप प्रवाशाने केला. आमदाराच्या सांगण्यावरून जागेची अदलाबदल न केल्याने हा प्रकार घडला. प्रवाशाने जागा न बदलल्याचा राग मनात धरून भाजपा आमदाराने समर्थकांना बोलावून प्रवाशाला मारहाण केल्याचा आरोप आहे.
माहितीनुसार, राजीव सिंह हे झांशी येथील बबीना मतदारसंघातील आमदार आहेत. घटनेच्या दिवशी ते वंदे भारत ट्रेनने प्रवास करत होते. त्यांच्यासोबत पत्नी आणि मुलगाही होता. आमदाराला एका प्रवाशाच्या जागेवर बसायचे होते, त्यासाठी त्यांनी या प्रवाशाला जागेची अदलाबदल करण्याची मागणी केली. परंतु प्रवाशाने त्यास नकार दिल्याने दोघांमध्ये वाद झाला. त्यानंतर संतापलेल्या आमदारांनी समर्थकांना बोलावून त्या प्रवाशाला बेदम मारले. या प्रकरणाबाबत जीआरपी, आरपीएफ आणि रेल्वे अधिकाऱ्यांनी पुष्टी केली परंतु कुणीही समोर येऊन बोलण्यास तयार नाही तर आमदार राजीव सिंह यांनी मी लिखित माझी बाजू मांडेन असं सांगितले आहे. सध्या झांशी जीआरपी स्टेशनमध्ये या प्रकाराची तक्रार नोंदवण्यात आली आहे.
नेमकं प्रकरण काय?
वंदे भारत ट्रेनमध्ये झांशीच्या बबीना मतदारसंघाचे आमदार राजीव सिंह त्यांच्या पत्नी आणि मुलासह दिल्लीहून झांशीला प्रवास करत होते. कोचमध्ये ८ नंबरवर राजीव सिंह, पत्नी कमल सिंह ५० नंबरवर तर श्रेयांश सिंह ५१ नंबरवर अशी तिकीट होती. वंदे भारत ट्रेन झांशी रेल्वे स्टेशनवर पोहचताच १०-१२ जण ट्रेनमध्ये घुसले आणि त्यांनी ४९ नंबरवर बसलेले प्रकाश नावाच्या प्रवाशाला मारहाण केली. पुढे काही करणार इतक्यात सिग्नल सुटल्याने ट्रेन भोपाळसाठी रवाना झाली.
दरम्यान, मध्य प्रदेशच्या पन्ना येथील काँग्रेसचे माजी आमदार मुकेश नायक आणि माजी मंत्री रामनिवास रावत यांनी या घटनेबाबत एक्सवर पोस्ट करून ही माहिती समोर आणली. काँग्रेसने या घटनेचा हवाला देत प्रवाशांच्या सुरक्षेचा प्रश्न ऐरणीवर आणला. एक वृद्ध व्यक्ती त्यांची जागा बदलण्यास नकार दिल्याने भाजपा आमदार राजीव सिंह यांच्या समर्थकांनी त्यांना बेदम मारले, त्यात त्यांच्या नाकातून रक्त आले. या प्रकारामुळे इतर प्रवाशांमध्येही दहशत पसरली. या प्रकरणावर ठोस कारवाई करावी अशी मागणी काँग्रेसने केली आहे.