नव्या लष्करप्रमुखांच्या नियुक्तीचा मार्ग मोकळा

भाजपाच्या आक्षेपामुळे रखडलेली नव्या लष्करप्रमुखांच्या नियुक्तीची प्रक्रिया निवडणूक आयोगाच्या परवानगीनंतर सोमवारी अखेर मार्गी लागली़.

 नवी दिल्ली : भाजपाच्या आक्षेपामुळे रखडलेली नव्या लष्करप्रमुखांच्या नियुक्तीची प्रक्रिया निवडणूक आयोगाच्या परवानगीनंतर सोमवारी अखेर मार्गी लागली़ आयोगाकडून हिरवा कंदिल मिळताच सरकारने तात्काळ प्रक्रिया सुरू करीत, नव्या लष्करप्रमुख पदासाठी लष्कर उपप्रमुख लेफ्टनंट जनरल दलबीरसिंह सुहाग यांच्या नावाची शिफारस केली़ उच्च सूत्रांनी दिलेल्या माहितीनुसार नव्या लष्करप्रमुखाच्या निवडीस कुठलीही हरकत नसल्याचे निवडणूक आयोगाने स्पष्ट केल्यानंतर, संरक्षण मंत्रालयाने सोमवारी तात्काळ नव्या लष्करप्रमुख पदासाठीची आपली शिफारस कॅबिनेटच्या निवड समितीकडे (एसीसी) पाठविली़ संरक्षण मंत्रालयाच्या शिफारशीत केवळ ५९ वर्षीय ले़ जनरल सुहाग यांचे एकट्याचे नाव आहे़ आता पंतप्रधांनाच्या नेतृत्वाखालील एसीसीला या शिफारशीवर निर्णय घ्यायचा आहे़ विद्यमान लष्करप्रमुख विक्रमसिंह येत्या ३१ जुलैला सेवानिवृत्त होत आहेत.पूर्वापार प्रथेनुसार, दोन महिन्यांआधीच पुढील लष्करप्रमुखाची नियुक्ती केली जाते़ तथापि, भाजपाने काँग्रेसप्रणीत संपुआ सरकारद्वारा नव्या लष्करप्रमुखांच्या नियुक्तीवर आक्षेप घेतला होता़ नव्या लष्करप्रमुखांची नियुक्ती नव्या सरकारवर सोडायला हवी, असे भाजपाचे मत आहे़ भाजपाच्या आक्षेपानंतर संपुआ सरकारने हा मुद्दा निवडणूक आयोगाकडे निर्णयार्थ पाठवला होता़ त्यावर निवडणूक आयोगाने आपली कुठलीही हरकत नसल्याचे संरक्षण आयोगाला सूचित केले़ चालू लोकसभा निवडणुका वा भविष्यात कुठल्याही निवडणुकांमध्ये संरक्षण दलांतील नियुक्त्या, बढत्या, निविदा वा खरेदी प्रक्रिया आदर्श आचारसंहितेंतर्गत येणार नाही़ त्यामुळे नव्या लष्करप्रमुख नियुक्तीची प्रक्रिया सरकार पार पाडू शकते, असे आयोगाने संरक्षण मंत्रालयाला पाठविलेल्या संदेशात स्पष्ट केले आहे़ लोकसभा निवडणूक मतमोजणी निकाल १६ मे रोजी जाहीर होणार आहे़ त्यापूर्वी नव्या लष्करप्रमुखाच्या नियुक्तीची घोषणा होईल, अशी दाट शक्यता आहे़ संरक्षण जाणकारांच्या मते, कुठल्याही सरकारच्या अंतिम कार्यकाळात नव्या लष्करप्रमुखपदाची घोषणा होत असेल, तर त्यामुळे कुठलाही नवा पायंडा पडणार नाही़ खुद्द भाजपाप्रणीत राष्ट्रीय लोकशाही आघाडीनेही आपल्या कार्यकाळाच्या अंतिम आठवड्यात अ‍ॅडमिरल अरुण प्रकाश यांना नौदलप्रमुखपदी नियुक्त केले होते़ (लोकमत न्यूज नेटवर्क)