Odisha Crime: ओडिशात अत्याचार पीडित महिलांनी आरोपीला शिक्षा देऊन स्वतःच न्याय मिळवून घेतल्याची घटना समोर आली आहे. ओडिशाच्या गजपती जिल्ह्यात लैंगिक अत्याचार करणाऱ्या एका ६० वर्षीय व्यक्तीची हत्या करून त्याचा मृतदेह जाळून टाकण्यात आला. पीडित महिलांनी मिळून हे कृत्य केल्याची माहिती स्थानिक पोलिसांनी दिली. या प्रकरणात आठ महिलांसह एकूण १० जणांना अटक करण्यात आली आहे. मृताच्या कुटुंबीयांनी को बेपत्ता झाल्याची तक्रार दाखल केल्यानंतर पोलिसांनी त्याचा शोध सुरू केला होता. तपासादरम्यान हा सगळा प्रकार उघडकीस आला.
पोलिसांनी सांगितले की, आम्हाला त्या माणसाची हत्या करण्यात आली होती आणि नंतर त्याचा मृतदेह जाळण्यात आला अशी माहिती मिळाली होती. गावापासून सुमारे दोन किलोमीटर अंतरावर असलेल्या जंगलाजवळील एका टेकडीवरून पोलिसांनी जळालेली हाडे आणि राख जप्त केली. याप्रकरणी गावातील एका वॉर्ड सदस्यासह दहा जणांना अटक करण्यात आली आहे.
हा सगळा धक्कादायक प्रकार ३ जूनच्या रात्री घडला. त्यानंतर सहा दिवसांनी पोलिसांना या प्रकरणाची माहिती मिळाली. मृत व्यक्तीने गावातील एका ५२ वर्षीय विधवेवर बलात्कार केल्याचा आरोप होता. याच व्यक्तीने आणखी काही महिलांवरही लैगिंक अत्याचार केले होते. त्यामुळे त्या सर्व महिलांनी एक येत अत्याचार करणाऱ्याला शिक्षा देण्याचा निर्णय घेतला. लैंगिक अत्याचाराला बळी पडलेल्या महिलांनी बैठक घेतली आणि त्याला ठार मारण्याचा ठरवले असं पोलिसांनी सांगितले.
त्यानंतर सर्व पीडित महिला त्या व्यक्तीच्या घरी गेल्या. तिथे तो झोपला होता. त्यावेळी ५२ वर्षीय विधवेने इतरांच्या मदतीने अत्याचार करणाऱ्याची हत्या केली. यावेळी दोन पुरुषांनीही महिलांना मदत केली. अटक केलेल्या सहा महिलांनी सांगितले की मृत झालेल्या व्यक्तीने त्यांचे लैंगिक शोषण केले होते आणि त्याला शिक्षा देण्यासाठी त्यांनी हे पाऊल उचलले. पीडित महिलांनी त्या पुरूषाविरुद्ध (मृत) पोलिसांकडे कोणतीही तक्रार दाखल केलेली नाही किंवा त्यांनी कधीही कोणत्याही प्रकारची मदत मागितली नाही, अशी माहिती गजपतीचे पोलीस अधीक्षक जतिंद्र कुमार यांनी दिली.