नितिश कुमारच मुख्यमंत्रीपदाचे उमेदवार, जनता परीवाराचा तिढा सुटला

भाजपाचा वारू रोखण्यासाठी जनता परीवाराच्या एकत्रीकरणावर आज सोमवारी शिक्कामोर्तब झाले तसेच मुख्यमंत्रीपदाचे उमेदवार नितिशकुमार असतिल असे जाहीर करण्यात आले आहे.

ऑनलाइन लोकमत

पाटणा, दि. ८ - अखेर भारतीय जनता पार्टीचा वारू रोखण्यासाठी जनता परीवाराच्या एकत्रीकरणावर आज सोमवारी शिक्कामोर्तब झाले असून बिहारमधल्या निवडणुकांमध्ये जनता परीवाराचे मुख्यमंत्रीपदाचे उमेदवार नितिशकुमार असतील असे जाहीर करण्यात आले आहे. मुलायमसिंग यादव व लालूप्रसाद यादव या दोघांनी तसे पत्रकारांना सांगून परीवारामध्ये मुख्यमंत्रीपदावरून खेचाखेची नसल्याचे सांगितले, तसेच जागावाटपही आपसात समजूतदारपणे करण्यात येईल असे सांगितले.

भाजपाला बिहारच्या निवडणुकांमध्ये धूळ चारायचीच असा विश्वास मुलायम, लालू व नितिशकुमार यांनी व्यक्त केला आणि त्यासाठी सगळे मतभेद विसरून जनता परीवार एकत्र आल्याचे सांगितले. भाजपाच्या जातीयवादाला संपवण्यासाठी आम्ही एकत्र आल्याचे या तिनही नेत्यांनी सांगितले. जनता परीवाराचे लोकसभेमध्ये १५ खासदार आहेत तर सध्या बिहारमध्ये जनता दल युनायटेडची सत्ता असून नितिशकुमार मुख्यमंत्री आहेत.

जनता परीवार एकत्र आल्यामुळे तसेच त्यांच्यासोबत काँग्रेसही राहणार असल्याचे नितिशकुमारांनी स्पष्ट केले असल्यामुळे या सगळ्यांचा मुकाबला भाजपा कसा करतो हे बघणे औत्सुक्याचे ठरणार आहे.