नवी दिल्ली: केंद्रीय मंत्रिमंडळ विस्ताराला थोड्याच वेळात सुरुवात होणार आहे. मोदींच्या मंत्रिमंडळात ४३ नव्या चेहऱ्यांचा समावेश आहे. त्याआधी आरोग्यमंत्री डॉ. हर्षवर्धन यांच्यासह अनेक महत्त्वाच्या नेत्यांनी राजीनामे दिले आहेत. त्यामुळे काही नव्या चेहऱ्यांना अतिशय महत्त्वाच्या मंत्रालयांची जबाबदारी मिळू शकते. त्याच पार्श्वभूमीवर पंतप्रधान नरेंद्र मोदींनी संभाव्य मंत्र्यांशी थोड्याच वेळापूर्वी संवाद साधला. त्यानंतर काही मिनिटांतच ४३ जणांची यादी समोर आली.मराठमोळ्या नेत्याला मोदींकडून मोठी संधी?; पहिल्याच रांगेतल्या 'त्या' चेहऱ्याची दिल्लीत चर्चा
पंतप्रधान मोदींनी बोलावलेल्या बैठकीत आणि त्यानंतर पुढे आलेल्या यादीत नारायण राणेंचं नाव लक्षवेधी ठरलं आहे. पंतप्रधान मोदी संभाव्य मंत्र्यांशी संवाद साधत असल्याचे दोन फोटो समोर आले आहेत. यापैकी एक फोटो समोरून काढण्यात आलेला आहे. यात सर्व संभाव्य मंत्री दिसत आहेत. फिजिकल डिस्टन्सिंग आणि मास्क असल्यानं सर्व उपस्थितांचे चेहरे नीट दिसत नाहीत. मात्र पहिल्या रांगेतील सर्वांचे चेहरे ओळखू येत आहेत. मोदींच्या उजव्या बाजूला पहिल्याच रांगेत भाजप खासदार नारायण राणे आहेत. राणेंना पहिल्याच रांगेत स्थान देण्यात आल्यानं त्यांना केंद्रीय मंत्रिमंडळात मोठी जबाबदारी मिळण्याची शक्यता आहे.मोदींच्या मंत्रिमंडळात कोण कोण? नारायण राणेंसह राज्यातील चार जणांना स्थान; पाहा संपूर्ण यादी
मोदींनी बोलावलेली बैठक संपताच थोड्याच वेळात ४३ जणांची यादी पुढे आली. या यादीतही नारायण राणेंचं नाव पहिल्या क्रमांकावर आहे. त्यानंतर सर्बांनंद सोनोवोल, विरेंद्र कुमार, ज्योतिरादित्य शिंदे, रामचंद्र प्रसाद सिंग, अश्विनी वैष्णव, पशुपति कुमार पारस, किरण रिजीजू, राजकुमार सिंह, हरदीप सिंग पुरी आणि इतरांची नावं आहेत. या यादीत राणेंसोबतच महाराष्ट्रातील आणखी ३ नेत्यांची नावं आहेत. मात्र त्यांची नावं बरीच खाली आहेत. त्यामुळे मोदींनी बोलावलेली बैठक आणि त्यानंतर समोर आलेली यादी पाहता राणेंना केंद्रात मोठी जबाबदारी दिली जाऊ शकते, अशी चर्चा दिल्लीत आहे.
राणेंना मंत्रिपद देण्यामागची राजकीय गणितं काय?राज्यात सध्या मराठा आरक्षणाचा विषय पेटला आहे. यावरून भाजप महाविकास आघाडी सरकारवर सातत्यानं निशाणा साधत आहे. अशा परिस्थितीत मराठा समाजातील मोठे नेते असलेल्या राणेंना केंद्रीय मंत्रिमंडळात स्थान देण्यात आलं आहे. राणे शिवसेनेला सातत्यानं लक्ष्य करत असतात. कोकणात शिवसेनेची ताकद आहे. राणेंनी मंत्रिपदाची रसद देऊन कोकणात शिवसेनेला शह देण्याचा भाजपचा प्रयत्न आहे.
कपिल पाटील यांच्या रुपात मोदी सरकारनं सोशल इंजिनीयरिंग केलं आहे. पाटील ओबीसी समाजातून येतात. सध्या राज्यात ओबीसी समाजाच्या राजकीय आरक्षणाचा विषय तापला आहे. त्याच पार्श्वभूमीवर पाटील यांना केंद्रात मंत्रिपद मिळत आहे. भारती पवार दिंडोरीच्या खासदार आहेत. २०१९ च्या लोकसभा निवडणुकीत त्या जवळपास दोन लाखांच्या मताधिक्क्यानं निवडून आल्या. तर डॉ. भागवत कराड राज्यसभेचे सदस्य आहेत. संघटनात्मक पातळीवर त्यांनी पक्षासाठी उत्तम काम केलं आहे.