हिंदूबहुल भागात मुस्लिम उद्योजक बांधतायत मशीद

जयपूर, दि. २० - जयपूरमधील मुस्लिम उद्योजक हिंदूबहुल भागातील गरिब हिंदूंच्या जमिनी विकत घेऊन त्यावर मशीद बांधत असल्याची माहिती समोर आली आहे. राजस्थानच्या अतिरिक्त पोलिस महासंचालकांनी (गुप्तवार्ता) तयार केलेल्या गोपनीय अहवालातून ही माहिती समोर आली असून पीपल युनियन फॉर सिव्हील लिबर्टीस (पीयूसीएल) या संस्थेने पोलिसांच्या या गोपनीय अहवालाच प्रश्नचिन्ह उपस्थित केले आहेत. 

राजस्थानमधील अतिरिक्त पोलिस महासंचालक (गुप्तवार्ता) यू. आर. साहू यांनी जयपूर जिल्हाधिकारी आणि पोलिस आयुक्तांना नुकताच एक गोपनीय अहवाल पाठवला आहे. 'जयपूरमधील हिंदूबहूल भागातील गरिब हिंदूंना मुस्लिम उद्योजक पैशांचे आमीष दाखवून त्यांच्या जमिनी विकत घेत आहेत. या जमिनींवर काही दिवसांनी मशीदी बांधल्या जात असल्याचे या अहवालात म्हटले आहे. या प्रकाराविषयी स्थानिक सरकारी यंत्रणांनी दक्ष राहावे असा इशाराही अहवालात देण्यात आला असून यासंदर्भात स्थानिक प्रशासकीय यंत्रणांनी चौकशी करुन योग्य कारवाई करावी असे निर्देश देण्यात आले आहे. 

जमात ए इस्लामी हिंदचे डॉ. इक्बाल, मुस्लिम उद्योजक हबीब गरनेत, श्रीयाज तकत, हाजी रफत, नईम कुरेशी, पप्पू कुरेशी, गफ्फर भाई टेंटवाला अशा अनेक उद्योजकांची नावेही या अहवालात आल्याने खळबळ माजली आहे. 

दरम्यान, पीयूसीएल या संघटनेने पोलिसांच्या अहवालातील आक्षेप फेटाळून लावले आहे. 'मुस्लिम उद्योजकांनी केलेल्या जमिनीच्या व्यवहारात कोणताही घोटाळा नसून पोलिसांचा हा गोपनीय अहवाल कसा फुटला याची चौकशी करावी अशी मागणीही संघटनेच्या पदाधिका-यांनी केली आहे.