राष्ट्रपती भवनातील मुघल गार्डन आजपासून सर्वांना खुले

तुम्ही या महिनाभरात दिल्लीत जाणार असाल, तर राष्ट्रपती भवनातील मुघल गार्डन पाहण्याची तुम्हाला संधी आहे. पंधरा एकरांवर असलेल्या या गार्डनमध्ये तुम्हाला असंख्य भारतीय व परदेशी फुले पाहायला मिळतील. एकट्या गुलाबाच्याच तिथे १५0 हून अधिक जाती आहेत, शिवाय कधीच न पाहिलेली फुले आणि त्यांची झाडे तिथे आहेत. दिल्ली शहराची उभारणी करणारा सर एडवर्ड ल्युटन्स याने या मुघल गार्डनची उभारणी केली होती. ब्रिटिश काळातील भारतातील व्हाइसरॉय व गव्हर्नर जनरल लॉर्ड हार्डिंग्जच्या पत्नीसाठी ते उभारण्यात आले. मुघल गार्डन उद्या, ६ फेब्रुवारीपासून ९ मार्चपर्यंत सकाळी साडेनऊ ते दुपारी साडेचार वाजेपर्यंत सर्वांसाठी खुले राहणार आहे. मात्र, दर सोमवारी ते देखभालीसाठी बंद राहील आणि २ मार्च रोजी होळीनिमित्तही ते बंद राहणार आहे. आणि हो, ते पाहण्यासाठी कोणतेही तिकीट नाही.