नवी दिल्ली - प्रियकरासोबत नको त्या अवस्थेत पाहिल्याने भीतीपोटी महिलेने आपल्या सहा वर्षाच्या मुलीची हत्या केल्याची धक्कादायक घटना समोर आली आहे. दिल्लीमधील गाजीपूर येथे ही घटना घडली. पोलिसांनी आरोपी आई आणि तिच्या प्रियकराला अटक केली आहे. शेजा-यांनी दिलेल्या माहितीनंतर पोलिसांना महिलेच्या विवाहबाह्य संबंधाबद्दल माहिती मिळाली. त्यानंतर कारवाई करत आरोपी महिला आणि तिचा प्रियकर सुधीर यांना अटक करण्यात आली अशी माहिती पोलीस उपायुक्त (पूर्व) ओमवीर सिंग यांनी दिली आहे.
'मुलीने आपण जे पाहिलं ते वडिलांना सांगण्याची धमकी दिल्यानंतर दोघांनी मिळून हत्येचा कट रचला', असं ओमवीर सिंग यांनी सांगितलं आहे. आरोपी महिला आपला पती आणि तीन मुलांसोबत राहत होती. त्यांना दोन मुलं आणि एक मुलगी होती. तिचा पती रोजंदारीवर काम करतो. आरोपी सुधीर हादेखील कामगार असून त्यांच्या शेजारीच राहायचा. आरोपी महिलेने आपल्या मुलांना तुमच्या बहिणीला भूत घेऊन गेल्याची खोटी माहिती दिली होती.
'गेल्या अनेक दिवसांपासून दोघांचं प्रेमप्रकरण सुरु होतं. मुलीने सुधीरसोबत नको त्या अवस्थेत पाहिल्यानंतर बुधवारी संध्याकाळी तिने मुलीच्या हत्येचा कट रचला. महिलेने मुलीचे हात धरले आणि सुधीरने तिचा गळा कापला. चौकशीदरम्यान दोघांनी आपला गुन्हा कबूल केला आहे', असं ओमवीर सिंग म्हणाले.
पोलिसांनी दिलेल्या माहितीनुसार, 'महिलेचा पती दारु पिण्यासाठी घराबाहेर गेला असताना प्रियकर सुधीर घरात शिरला. दोघेजण तिला घेऊन शेजा-यांच्या गच्चीवर गेले आणि हत्या केली. हत्या झाली तेव्हा दोन्ही मुलं घरात बसून टीव्ही पाहत होते'. पोलिसांनी हत्येसाठी वापरण्यात आलेला चाकू जप्त केला आहे.
हत्या केल्यानंतर सुधीर तेथून निघून गेला आणि आरोपी महिलेने मुलगी बेपत्ता झाल्याची आरडाओरड सुरु केली. यानंतर आपल्या पती आणि शेजा-यांसोबत मिळून मुलीचा शोध घेण्याचं नाटक सुरु केलं. पोलिसांनाही रात्री 10 वाजण्याच्या सुमारास मुलगी बेपत्ता झाल्याचा कॉल गेला. यानंतर पोलिसांनीही शोध सुरु केला. रात्री 1.30 वाजण्याच्या सुमारास गच्चीवर मुलीचा मृतदेह आढळून आला. मुलीला रुग्णालयात नेण्यात आलं, पण तोपर्यंत तिचा मृत्यू झाला होता.
'चौकशीदरम्यान मुलीची आई शांत होती. पण शेजा-यांनी आम्हाला तिच्या विवाहबाह्य संबंधाची माहिती दिल्यानंतर आमची संशय वाढला. कसून चौकशी केली असता महिला आणि तिचा प्रियकर सुधीरने गुन्हा कबूल केला', अशी माहिती पोलीस अधिका-याने दिली आहे.