अयाज मेमन
नवी दिल्ली : पहिल्याच षटकात बसलेल्या धक्क्यानंतर फाफ डुप्लेसिस आणि मोइन अली मुंबई इंडियन्सवर अक्षरश: बरसले. त्यांनी दुसऱ्या गड्यासाठी १०८ धावांची भागीदारी करून चेन्नई सुपरकिंग्सच्या भल्यामोठ्या धावसंख्येचा पाया रचला. किएरॉन पोलार्डने एकाच षटकात दोन बळी घेत, मुंबईला पुनरागमन करून दिले, परंतु अंबाती रायुडूने २७ चेंडूंत नाबाद ७२ धावांचा जबर तडाखा देत, चेन्नईला २० षटकांत ४ बाद २१८ धावांची मजबूत मजल मारून दिली.
अरुण जेटली स्टेडियमवर नाणेफेक जिंकून मुंबईने प्रथम गोलंदाजीचा निर्णय. गोलंदाजीचा हा निर्णय चेन्नईने चुकीचा ठरविला. पहिल्याच षटकात ट्रेंट बोल्टने युवा ॠतुराज गायकवाडला बाद केले. मात्र, यानंतर अली मुंबईकरांवर तुटून पडला. त्याने बोल्टसह सर्वच गोलंदाजांवर तुफानी हल्ला करताना चेन्नईच्या धावगतीला कमालीचा वेग दिला.
अलीची फटकेबाजी पाहून डुप्लेसिसही चार्ज झाला आणि त्यानेही मुंबईकरांविरुद्ध आक्रमक फटके मारले. यामुळे दोन्ही टोकांकडून मुंबईकरांची बेदम पिटाई झाली. चेन्नईने बघता-बघता १० हून अधिकच्या सरासरीने धावा काढल्या. यामध्ये आघाडीवर राहिला तो मोइन अली. त्याने ३६ चेंडूंत ५चौकार व ५ षटकारांसह ५८ धावा कुटल्या. फाफ डुप्लेसिसनेही २८ चेंडूंत ५० धावा केल्या. हे दोघे खेळपट्टीवर असेपर्यंत मुंबईकर गोलंदाजांची लय बिघडलेली होती. मात्र, हुकमी गोलंदाज जसप्रीत बुमराहने अलीला बाद करून मुंबईसाठी मोलाचे कार्य केले. यानंतर, पोलार्डने आपल्या पहिल्याच षटकात डुप्लेसिस व सुरेश रैना यांना बाद करून मुंबईला पुनरागमन करून दिले. यामुळे चेन्नईचा डाव १ बाद ११२ धावांवरून ४ बाद ११६ धाव असा घसरला.
दोन स्थिरावलेले फलंदाज पाठोपाठ बाद झाल्याने चेन्नईच्या धावगतीलाही ब्रेक लागला. यावेळी मुंबई पकड मिळवणार असे दिसत असताना, अंबाती रायुडू तळपला. त्याने ४ चौकारांसह ७ षटकारांचा पाऊस पाडत मुंबईकरांची धुलाई केली. अवघ्या २० चेंडूंत अर्धशतक झळकावत रायुडूने महेंद्रसिंग धोनीच्या वेगवान अर्धशतकाशी बरोबरी केली. त्याने जडेजासह पाचव्या गड्यासाठी १०२ धावांची नाबाद भागीदारी केली.
महत्त्वाचेnॠतुराज गायकवाड यंदाच्या सत्रात तिसऱ्यांदा डावखुऱ्या गोलंदाजाचा शिकार ठरला. या आधी तो अर्शदीप सिंग आणि मुस्तफिझूर रहमान यांच्या गोलंदाजीवर बाद झाला होता. nरोहित शर्मा ३५० टी-२० सामना खेळणारा पहिला भारतीय ठरला. nसुरेश रैनाने २००वा आयपीएल सामना खेळला. nयंदाच्या आयपीएलमध्ये सीएसकेकडून चार शतकी भागीदारी झाल्या. nआयपीएलमध्ये दुसऱ्यांदा जसप्रीत बुमराहने ५०हून अधिक धावा दिल्या. nअंबाती रायुडू सीएसकेकडून तिसऱ्या क्रमांकाचे वेगवान अर्धशतक झळकावले. nसीएसकेकडून सलग चार अर्धशतक झळकावणारा फाफ डुप्लेसिस पहिला फलंदाज ठरला.
षटकारांचा पाऊसचेन्नई सुपरकिंग्सच्या फलंदाजांनी यावेळी तुफानी हल्ला करताना मुंबईकरांची लय बिघडविली. आयपीएलमधील सर्वोत्तम गोलंदाजी मानले जात असलेल्या मुंबई इंडियन्सविरुद्ध सीएसकेच्या फलंदाजांनी कोणतीही दयामाया दाखविली नाही. मोईन अलीने ५, फाफ डुप्लेसिसने ४, तर अंबाती रायुडूने ७ षटकार ठोकत सीएसकेच्या धावगतीला वेग दिले. मुंबईविरुद्ध यावेळी एकूण १६ षटकार बसले.