आधुनिक युगात मोबाईल आपल्या जीवनाचा अविभाज्य भाग बनला आहेत. मोबाईल आपल्या कामासाठी आणि संपर्कासाठी खूप उपयुक्त असला तरी, कधीकधी तो जीवघेणाही ठरू शकतो. गुजरातमधील पाटण जिल्ह्यातून अशीच एक दुर्दैवी घटना समोर आली आहे, ज्यात मोबाईल स्फोटामुळे एका तरुणाचा मृत्यू झाला. या घटनेने मोबाईल सुरक्षिततेचा प्रश्न पुन्हा ऐरणीवर आला आहे.
काय घडले बिलिया गावात?
पाटण जिल्ह्यातील सिद्धपूर पोलीस स्टेशन हद्दीतील बिलिया गावात देवेंद्र पटेल नावाचा तरुण आपल्या मोपेडवर बसून व्हिडीओ कॉलवर बोलत होता. त्याचवेळी अचानक त्याच्या मोबाईलचा मोठा स्फोट झाला. स्फोट इतका जबरदस्त होता की, देवेंद्र गंभीर जखमी झाला. त्याच्या मोपेडजवळ पेट्रोलचा कॅन असल्यामुळे परिस्थिती आणखी बिकट झाली. मोबाईल स्फोटामुळे लागलेली आग पेट्रोलमुळे भडकली आणि देवेंद्रला त्यात जीव गमवावा लागला.
आग इतकी भीषण होती की, देवेंद्रचे हात-पाय आणि शरीराचा मोठा भाग भाजला. ही घटना पाहून स्थानिक लोकही गोंधळले. त्यांनी तात्काळ पोलिसांना माहिती दिली. पोलीस घटनास्थळी पोहोचले आणि त्यांनी मृतदेह ताब्यात घेऊन शवविच्छेदनासाठी पाठवला. या प्रकरणाचा पुढील तपास सुरू आहे.
यापूर्वीही घडली होती अशी घटना
मोबाईल स्फोटाची ही पहिलीच घटना नाही. यापूर्वी उत्तर प्रदेशातील बाराबंकी जिल्हा रुग्णालयातही अशीच एक घटना घडली होती. तिथे उपचारासाठी आलेल्या एका तरुणाच्या खिशात ठेवलेल्या मोबाईलचा अचानक स्फोट झाला होता. यात तो तरुण गंभीर जखमी झाला होता.